Qatar poytaxti Dohada imzolangan tinchlik bitimi AQSh kuchlarining Afg‘onistondan butunlay chiqib ketishiga yo‘l ochadi, deb xabar bermoqda Al Jazeera.

Bugun, 29-fevral kuni AQSh rasmiylari va Tolibon vakillari Qatar poytaxtida Afg‘onistonda davom etgan uzoq yillik urushni to‘xtatish uchun bir necha oy davom etgan muzokaralardan so‘ng yakuniy tinchlik bitimini imzoladi.

Dohada Pokiston, Hindiston, Indoneziya, O‘zbekiston va Tojikiston rasmiylari ishtirokida imzolangan bu bitim Amerika qo‘shinlarini mamlakat hududidan olib chiqishga yo‘l ochadi.

Avvalroq, Tolibon barcha jangchilariga janglarni to‘xtatish va hujumlardan saqlanishni buyurgandi.

Dohadagi toliblar vakili Muhammad Naim kelishuvni “oldinga tashlangan qadam” deb baholadi.

“Bu kelishuv bilan Afg‘onistonda urush tugaydi”, dedi u Al Jazeera nashriga.

Bitim imzolanishidan bir necha daqiqa oldin AQSh va Afg‘oniston hukumati qo‘shma bayonotida aytilishicha, AQSh va NATO qo‘shinlari 14 oy ichida Afg‘onistondan chiqib ketishadi.

Afg‘onistonda qariyb 14000 AQSh qo‘shinlari va NATOning 39 ittifoqchisi va sherik-davlatlaridan 17000 ga yaqin harbiylar joylashgan.