Toshkent shahar hokimligi "O‘rikzor" savdo majmuasida koronavirus infeksiyasi aniqlanganini tasdiqladi.

Hokimlikka ko‘ra, kecha, 22-may kuni “O‘rikzor“ savdo majmuasi MChJda jami 789 nafar fuqarodan surtmalar olingan. Tahlil natijalariga ko‘ra, mazkur savdo majmuasidagi oziq-ovqat do‘konida sotuvchi bo‘lib ishlovchi fuqaroda koronavirus infeksiyasi tasdiqlangan.

“Ayni paytda ushbu bemor bilan muloqotda bo‘lgan barcha fuqarolar o‘rnatilgan tartibda qat’iy karantin kuzatuviga olindi”, deyiladi Toshkent shahar hokimligi xabarida.

Shunga ko‘ra, “O‘rikzor” savdo majmuasida epidemiologik surishtiruv ishlarini o‘tkazish hamda kasallik tarqalishining oldini olish, sanitar tozalash va zararsizlantirish ishlarini o‘tkazish maqsadida savdo majmuasi faoliyati vaqtincha to‘xtatilgan.

Eslatib o‘tamiz, 11-may kuni “Farhod” bozori hududidagi avtomobil ehtiyot qismlari savdo majmuasida ham koronavirusga gumon qilinib bir nafar shaxs izolyatsiyaga olingan, ammo 12-may kuni SSV 989-yilda tug‘ilgan ushbu fuqarodan koronavirusga o‘tkazilgan diagnostik tahlil unda  “Covid-19”  infeksiyasi  aniqlanmaganligini ma’lum qilgan edi.

Uchtepa tuman hokimiyati esa do‘konlarni sanitariya qoidalarida belgilangan standartlarga muvofiq tayyorlash bo‘yicha ishlar olib borilgandan so‘ng, avtoulov ehtiyot qismlari do‘konlari o‘z faoliyatini davom ettirishini ma’lum qilgandi.