AQSh chorshanba kuni Afg‘onistonning janubiy Gelmand viloyatidagi Tolibon jangarilariga havodan hujum qildi, deb yozmoqda AQSh qo‘shinlarining Afg‘onistondagi vakili, polkovnik Sonni Legget o‘zining Twitter'dagi sahifasida.

Ma’lumotlarga ko‘ra, tolibonlar Afg‘oniston milliy xavfsizlik kuchlari nazorat punktiga hujum qilgan. 

“Bu hujumni to‘xtatish uchun mudofaa zarbasi bo‘ldi”, dedi Afg‘onistondagi vakil Sonni Legget.

Uning so‘zlariga ko‘ra, Vashington tinchlikka sodiq, ammo afg‘on harbiy kuchlarini himoya qilish uchun doim yordamga tayyor.

“Tolibon rahbariyati xalqaro hamjamiyatga zo‘ravonliklarni kamaytirishga va’da bergan. Biz Tolibonni keraksiz hujumlarni to‘xtatishga va majburiyatlarini bajarishga chaqiramiz “, deydi polkovnik Legget.

Bu shanba kuni Dohada imzolangan AQSh va Tolibon o‘rtasidagi tinchlik shartnomasidan keyingi birinchi hujum bo‘ldi.

Tolibon haligacha hujum uchun javobgarlikni bo‘yniga olmadi va Amerikaning havo hujumiga ham rasmiy izoh bermadi.