Boksning og‘ir vazn toifasida 4 karra jahon chempioni 57 yoshli Evander Xolifild azaliy raqibi Mayk Taysonga qarshi uchinchi jangda ishtirok etmoqchi ekanligini ma’lum qildi.

Ta’kidlanishicha, Xolifild bu jangni tashkillashtirishni chin dildan xohlayapti. Sportchilarning yoshi oltmishga borib qolganiga qaramay, boks ishqibozlariga haqiqiy trilogiya ko‘rsata olishiga ishonmoqda.

“Unga nisbatan hech qanday adovatim yo‘q, o‘ylashimcha, bu sport uchun yaxshi bo‘ladi.

U ko‘plab takliflar olayotganidan xabarim bor. Ikkimiz ham boksga qaytishimizni e’lon qilganimizdan keyin men va Mayk o‘rtasidagi jang barcha ko‘rishni xohlaydigan voqeaga aylandi”, deydi bokschi.

Ma’lumot o‘rnida, Tayson va Xolifild ikki bor 1996 va 1997-yillarda o‘zaro jang qilgan. Birinchi jangda Xolifild Taysonni nokautga uchratgan, ikkinchi to‘qnashuvda esa Mayk raqibining qulog‘ini tishlab olgan va diskvalifikatsiya qilingan.