Tojikiston rasmiylarining e’lon qilishicha, O‘zbekiston sarhadlariga yaqin “Sultonobod” chegara postiga hujum “Islom davlati” (ID) guruhi jangarilari tomonidan amalga oshirilgan. Qurolli hujumda bir chegarachi, bir politsiya xodimi va 15 nafar hujumchi o‘ldirilgan.

Tojikiston rasmiylariga ko‘ra, besh qurolli hujumchi qo‘lga olingan.

Tojikiston chegara qo‘shinlari matbuot markazining 6-noyabrda xabar berishicha, qo‘lga olinganlar so‘roq qilingach, qurolli hujumchilarning ID guruhi buyrug‘i bilan 3-noyabrga o‘tar kechasi Afg‘oniston shimoli-sharqidagi Qunduz viloyatining Qal’ai Zol tumanidan Tojikiston janubidagi Qubodiyon tumani hududiga sizib kirganliklari ma’lum bo‘lgan. Tergov paytida terrorchilar “Ishkobod” chegara posti ular uchun “eng qulay joy” ekanligini tan olishdi.

"Hujum qilgan noma’lum kishilar Afg‘onistondan maxsus topshiriq bilan kelgan IShID (O‘zbekistonda faoliyati taqiqlangan tashkilot) guruhi a’zolaridir", deyiladi Tojikiston Chegara qo‘shinlari xabarida.

Tojikiston IIV amaliyot chog‘ida guruhga tegishli 4 avtomashina yo‘q qilinganini ma’lum qilgan.

Hodisa sodir bo‘lgan hududda yo‘llar yopilgan, Tojikistonning boshqa mintaqalari va poytaxt Dushanbeda qurolli postlar qo‘yilgan.

Avvalroq, O‘zbekiston chegara xizmati chegara postiga qilingan hujum tafsilotlarini o‘rganayotganligi haqidagi xabar  berilgan edi. 

Ma’lumot uchun, bugun, 6-noyabr Tojikistonda konstitutsiya kuni bo‘lib, dam olish kuni hisoblanadi.