Bugun, 2-aprel kuni Axborot va ommaviy kommunikatsiyalar agentligi huzuridagi shtabda Mahalla va oilani qo‘llab-quvvatlash vaziri o‘rinbosari Elmira Bositxonova ishtirokida brifing o‘tkazildi.

Brifingda aholi tomonidan “immuniteti nisbatan past bo‘lgan aholi toifalari — keksalar va nuroniylar, nogironlar, yolg‘iz yashovchi fuqarolarning xonadonlariga turli homiylar, volontyorlar tomonidan xayriya mahsulotlari eltib berilayotgani karantin talablariga xilof emasmi?” degan masala ko‘tarildi.

Vazir o‘rinbosarining ta’kidlashicha, “ularni o‘zimiz zararlab qo‘yish ehtimolimiz kafolatlanganmi? Qosh qo‘yaman deb ko‘z chiqarib qo‘ymaymizmi? Olib borilayotgan mahsulotlar karantin talablari darajasida yetkazilyaptimi?” degan mazmundagi tashvishli murojaatlar juda ko‘p bo‘lmoqda.

“Keyingi 5 kunda vazirlikka kelib tushgan murojaatlarni tahlil qilib ko‘rdik. 494 ta shu mazmunda murojaat bo‘lgan.

Haqiqatda, oilalarni, odamlarni, ayniqsa, xonadonimiz farishtalari — duogo‘ylarimizni asrashimiz kerak.

Bundan tashqari, ayrim xonadonlarga ustma-ust yordam berilgani holda, ayrim xonadonlar e’tibordan chetda qolayotgani haqida ham 200 ga yaqin norozilik murojaatlari bo‘ldi. 

Ushbu holatlarni inobatga olgan holda, eng muhimi — koronavirus xavfidan aholini maksimal darajada himoyalash uchun karantin talablarini kuchaytirish — eng to‘g‘ri yo‘l hisoblandi”, deydi Mahalla va oilani qo‘llab-quvvatlash vaziri o‘rinbosari Elmira Bositxonova.