Uy yig‘ishtirish – muhim masalalardan. Har bir uy bekasi tozalikka rioya qilish orqali o‘z oilasi, yaqinlarining sog‘lig‘ini himoya qiladi. Biroq bekajonlar doimiy ravishda qo‘llaydigan do‘konlardan sotib olinadigan tozalash vositalari garchi samarali bo‘lsa-da, salomatlikka aks ta’sir ko‘rsatadi. Bunday vositalar allergik reaksiyalarni keltirib chaqiradi. 

Biz maishiy kimyoviy vositalarisiz qanday qilib tozalash ishlarini samarali amalga oshirish mumkinligiga to‘xtalmoqchimiz. Tozalash vositasini uydagi bor narsadan tayyorlash mumkin.  

Ana shunday tozalash vositalaridan birini sirka va iste’mol sodasi bilan tayyorlasa ham bo‘ladi. Uning qanday afzalliklari bor? 

Avvalo, xavfsiz. Do‘kondan sotib olinadigan vositalar tarkibida fosfor, ammiak kabi har xil kimyoviy moddalar mavjud. Agarda allergiya keltirib chaqiradigan bo‘lsa, demak, bu vosita toksik emas.

Yarqiratib tozalaydi

Sirka yog‘ va choygum tagidagi toshlarni eritib yuboradi. Shisha, teri va yog‘ochlarni yarqiratib tozalaydi. Vannalarda paydo bo‘ladigan sariqlikni yaxshi ketkazadi. Osh sodasi esa yog‘larni ketkazadi, shisha va chinni buyumlarni yarqiratadi. Yoqimsiz hidni yo‘qotadi. 

Ikkalasining aralashmasi yordamida zararli bakteriyalar va viruslardan, aynan gripp viruslaridan xalos bo‘lish mumkin. Oshxona, vannaxonadagi quvurlarda suv to‘planib qolish holatlari kuzatilsa, bu aralashma yordamga keladi va suv yo‘lini ochib yuboradi. Buning uchun rakovinada yig‘ilib qolgan suv butunlay oqib ketishini kutish, so‘ngra bir stakan osh sodasini sepib, ustidan bir stakan sirkani quyish tafsiya etiladi. Oradan yarim soat o‘tgach qaynoq suv bilan yuvib yuboriladi.