Xabaringiz bor, dastavval Xitoyning Uxan shahrida aniqlanib, soʻngra koʻplab davlatlarga kirib borgan COVID-19 koronavirusi ayni kunlarda butun dunyoni tahlikaga solib qo‘ydi. 
Mavjud sharoitni inobatga olgan holda, qolaversa, hukumat tomonidan berilgan koʻrsatma va tavsiyalar ijrosini taʼminlash maqsadida Jismoniy tarbiya va sport vazirligining buyrugʻi qabul qilingan. Bu haqda vazirlik matbuot xizmati xabar bermoqda.

Unga koʻra, O‘zbekiston Respublikasi hududida oʻtkazilishi rejalashtirilgan xalqaro tadbirlar va sport musobaqalari vaqtincha toʻxtatiladi. Bundan koʻzlangan asosiy maqsad – koronavirus epidemiyasini tarqalishining oldini olish boʻlib, buyruq bilan xalqaro musobaqalarda Oʻzbekiston milliy terma jamoa aʼzolarining ishtiroki hamda tizim xodimlarining xorijiy xizmat safarlari vazirlik bilan kelishilgan holda amalga oshirilishi belgilab qoʻyilgan.

Shuningdek, sport turlari boʻyicha respublika sport musobaqalari (chempionat va kuboklar) Oʻzbekiston Respublikasi Sogʻliqni saqlash vazirligi, hududiy sport musobaqalarini esa hududiy sogʻliqni saqlash boshqarmalari bilan kelishgan holda oʻtkaziladi.