Sovuqda uzoq vaqt piyoda yurish oqibatida oyoqlar qishki poyabzal ichida ham “muzlaydi”. Bu esa darrov shamollab qolishga, tomoq og‘rig‘i, tumov kabi alomatlar boshlanishiga sabab bo‘ladi. Xo‘sh, oyoqlar poyabzal ichida sovqotmasligi uchun nima qilish kerak?   

Oyoqlarni isitamiz

•  Qishda imkon qadar tabiiy va sifatli charmdan tayyorlangan, ichi issiq junli poyabzal kiyishga harakat qiling. 

•  Charm oyoqkiyim o‘rnini “nubuk” materialidan tayyorlangan poyabzallar ham bosishi mumkin.

Yuqoridagi poyabzallar bo‘lmasa-chi?

Bunday holatda sizga issiqni saqlash uchun folga yordam berishi mumkin. Folga bilan oyog‘ingizni o‘rab-chirmab oling, demoqchi emasmiz. Bor-yo‘g‘i undan oyoq o‘lchamingizga moslab taglik kesib olinadi va hosil bo‘lgan taglikdan 2-3 ta, uzunligi yarim sm.li  kesma tayyorlanadi. Bu oyoq kaftining nafas olishi uchun imkon beradi.

Hosil bo‘lgan folgali taglik poyabzal ostiga to‘shaladi va ustidan oddiy yungli taglik qo‘yiladi. Mana, endi sayrga bemalol otlansangiz bo‘ladi. Endi oyoqlaringiz muzlamaydi va uzoq sayrlar sizni qiynamaydi.