O‘zbekiston Respublikasining Jinoyat kodeksiga o‘zgartish va qo‘shimchalar kiritishni nazarda tutuvchi qonuni loyihasi e’lon qilindi.

Unga ko‘ra, amaldagi Jinoyat kodeksining 179-, 182-, 192- hamda 242-moddalariga quyidagi o‘zgartish va qo‘shimchalar kiritilishi mumkin:

–179-modda, ya’ni “Soxta tadbirkorlik”ni nazarda tutuvchi modda chiqarib tashlanadi;
–182-modda, ya’ni “Bojxona to‘g‘risidagi qonun hujjatlarini buzish”ni nazarda tutuvchi modda quyidagi mazmundagi uchinchi qism bilan to‘ldiriladi:
   
“Ushbu moddaning birinchi qismida nazarda tutilgan jinoyatni birinchi marta sodir etgan shaxs, agar u jinoyat ishi qo‘zg‘atilgan kundan e’tiboran o‘ttiz kun ichida bojxona to‘lovlarini to‘liq to‘lasa, javobgarlikdan ozod etiladi”;
–192-modda, ya’ni “Raqobatchini obro‘sizlantirish”ni nazarda tutuvchi modda chiqarib tashlanadi;

–242-modda, ya’ni “Jinoiy uyushma tashkil etish”ni nazarda tutuvchi modda quyidagi mazmundagi uchinchi qism bilan to‘ldiriladi:

“Yuridik shaxsning muassislari, rahbarlari, xodimlari, uning tuzilmaviy bo‘linmalari rahbarlari, xodimlari yuridik shaxs tomonidan tadbirkorlik faoliyatini yoki boshqa iqtisodiy faoliyatni amalga oshirish bilan bog‘liq jinoyatlar uchun ushbu moddaning birinchi qismi bo‘yicha jinoiy javobgarlikka tortilmaydi, bundan yuridik shaxs, uning tuzilmaviy bo‘linmasi bir yoki bir nechta og‘ir yoki o‘ta og‘ir jinoyatlar sodir etish uchun atayin tashkil etilganligi hollari mustasno”.

Eslatib o‘tamiz, O‘zbekiston Prezidentining Oliy Majlisga Murojaatnomasida Shavkat Mirziyoyev mazkur masala haqida alohida to‘xtalib, jumladan shunday degan edi:
“Yuridik shaxs bo‘lgan tadbirkorlik subyekti a’zolariga “jinoiy uyushma” degan ayblov qo‘yib, ularga og‘ir jazo tayinlash kabi allaqachon umrini o‘tab bo‘lgan tartiblarni bekor qilish vaqti yetdi. Buning oqibatida yuzlab tadbirkorlar qanchadan-qancha aziyat chekib, moddiy zarar ko‘rayotganlarini inobatga olsak, bu o‘zgarishlarning qanday katta ahamiyatga ega ekani yaqqol ayon bo‘ladi”.