O‘zbekiston Respublikasi Prezidenti tomonidan “Paxtachilik sohasida bozor tamoyillarini keng joriy etish chora-tadbirlari to‘g‘risida”gi qaror qabul qilindi. Qarorga ko‘ra, davlat tomonidan endi paxta xomashyosini ishlab chiqarish va sotish rejasini hamda  xarid narxini belgilash amaliyotidan voz kechiladi, deb xabar bermoqda Rewiew nashri.

O‘zbekiston Prezidentining 2019-yil 23-oktabrdagi “O‘zbekiston Respublikasi qishloq xo‘jaligini rivojlantirishning 2020-2030-yillarga mo‘ljallangan strategiyasini tasdiqlash to‘g‘risida”gi PF-5853-son Farmoni ijrosini ta’minlash, davlat buyurtmasi hajmlarini bosqichma-bosqich kamaytirish, shu jumladan, paxta xomashyosi yetishtirish, xarid qilish va sotishda erkin raqobatni ta’minlaydigan bozor tamoyillarini joriy etish, ushbu yo‘nalishda fermer xo‘jaliklari manfaatdorligini oshirish hamda qishloq xo‘jaligi sohasiga investitsiyalarni keng jalb qilish maqsadida O‘zbekiston Respublikasi Prezidenti tomonidan “Paxtachilik sohasida bozor tamoyillarini keng joriy etish chora-tadbirlari to‘g‘risida”gi qaror qabul qilindi.

Unga ko‘ra, 2020-yil hosilidan boshlab:
– davlat tomonidan paxta xomashyosi ishlab chiqarish va sotish rejasini belgilash amaliyoti bekor qilinadi;
– paxta xomashyosining xarid narxini belgilash amaliyotidan voz kechiladi;
– paxta xomashyosi yetishtiruvchilarga rayonlashtirilgan navlarni erkin tanlash huquqi beriladi;
– sertifikatlangan urug‘lik yetkazib berish tizimi saqlab qolinadi hamda bosqichma-bosqich Urug‘chilikni rivojlantirish markazi tarkibidagi urug‘chilik klasterlari va elita urug‘chilik xo‘jaliklari, paxta to‘qimachilik klasterlari zimmasiga yuklatiladi.

Shuningdek, hujjatda paxta-to‘qimachilik klasterlari tashkil etilmagan hududlarda paxta tozalash korxonalari ishtirokida fermer xo‘jaliklarining ixtiyoriy kooperatsiyasini tashkil etish, “O‘zpaxtasanoat” aksiyadorlik jamiyatini tugatish choralarini ko‘rish, paxta tolasini respublika tovar-xomashyo birjasida boshlang‘ich birja narxida erkin sotish vazifalari belgilangan.