Tishlar og‘izdan yoqimli hid kelishi uchungina tozalanmasligi kerak! Tish tozalashdan eng birinchi maqsad bu, tish va milklar salomatligini saqlashdan iborat bo‘lmog‘i lozim. Biroq, ko‘pchiligimiz tishlarni tozalashda bir xil xatoga yo‘q qo‘yamiz va oqibatda tishlarimizni yo‘qotamiz. Yoki bo‘lmasa, tishlarni davolash uchun stomatologga yugurishga majbur bo‘lamiz... 
Buni chetlab o‘tish uchun esa, quyida keltirilgan xatoliklarga yo‘l qo‘ymang.

1. Tish chotkasini noto‘g‘ri ushlash va uni noto‘g‘ri harakatlantirish
Tish chotkasini tishning tashqi yuzasida, 45 daraja ostida ushlash kerak. Tishlarni aylanma harakatlar bilan, chotkani esa milklardan tish chetiga qarab harakatlantirish o‘rinli. Bunday texnika tishlar orasini ham yaxshilab tozalashga yordam beradi. Har bir tish yuzasi 6 ta harakatlar bilan tozalab chiqiladi.

2. Tishlarning hammasini tozalamaslik
Har bir tishda beshta yuza bor. Chotka va pasta bilan ulardan uch qismini – old, chaynov va ichki tomonni tozalash mumkin. Tishning chet va oraliq qismlarini maxsus tish tozalovchi iplar yordamida tozalash maqsadga muvofiqdir. Bu kariyesning oldini olishga yordam beradi.    

3.  Yetarlicha tozalamaslik
Tish tozalash jarayoni 2 daqiqani tashkil etishi kerak. Karashlarning oldini olish uchun ham xuddi shuncha vaqt talab etiladi. Tozalash jarayonida vaqtga qarash yodingizdan chiqib qolsa, kerakli muddatni qo‘shiq tinglash orqali ham belgilash mumkin. Bitta qo‘shiq 2-3 daqiqa davom etadi.   

4.  Noto‘g‘ri chotkalardan foydalanish
Chotka boshchasi uncha katta bo‘lmasligi, tolalar yuzasi notekis bo‘lganlarini tanlagan ma’qul. Tish chotkasi tolalari yumshoq bo‘lishi lozim. Qattiq tolali tish chotkasi milklarni jarohatlaydi, tish emali zararlanishi mumkin.

5. Tish chotkasini kam yangilash
Muddatidan ko‘p qo‘llanilgan tish chotkasi og‘iz bo‘shlig‘ini tozalash o‘rniga aksincha, zararlaydi. Katta yoshli insonlar har uch oyda bir marta tish chotkasini almashtirib turishlari kerak. Bolalarga esa 2-2,5 oyda bir marta yangilash tavsiya etiladi.  

6. Tarkibida ftorsiz pastadan foydalanish
Tarkibida ftor mavjud tish pastalari kariyesning oldini oluvchilardir. Ftor tish emalini mustahkamlab, zararli mikroblar ko‘payishini to‘xtatadi, ularga halokatli ta’sir ko‘rsatadi. Kattalarga tarkibida ftor miqdori 1350-1500 ppm. bo‘lgan tish pastasidan foydalanishlari tavsiya etiladi. Bolalar uchun esa 1000 ppm. miqdordagi tish pastalari mos keladi. 

7. Og‘izni ko‘p chayish
Patsadagi ftor tishlarga ta’sir ko‘rsatishi uchun vaqt kerak. Tish orasidagi qolib ketgan ftor qoldiqlarini suv bilan chayish tashlash esa kerakli natijani bermaydi. Og‘izni ko‘p miqdorda suv bilan chayqash ham tavsiya etilmaydi.

8. Ovqatlanib bo‘lgach darhol tishni tozalash
Ovqatlanishdan so‘ng og‘izda zararli bakteriyalar faollashadi. Ular tish emalini yumshatuvchi ta’sir ko‘rsatadi. Bu vaqtda tishni tozalash emalning jiddiy zararlanishiga sababchi bo‘ladi. Mutaxassislar tishni ovqatlanishdan 30 daqiqa o‘tgach tozalashni tavsiya etishadi.