"Юлдузчалар жамоаси"

Бокс 10-11-2014

Дарвозабон

Жо ван дер Сар - 16 ёш, "Аякс" Кичкина Жо отаси каби футболчи бўлишни, бўлганда ҳам, айнан дарвозабон бўлишни ихтиёр этган. Ёш дарвозабон болалигиданоқ "Аякс" мактабида тарбияланди ва етарли даражада тарбиялангач, қуйи лигадаги "Нордвийк" жамоасида ҳам ўзини синаб кўриб, тажриба тўплади. Ўтган ёзда у яна "Аякс"га, отаси ёнига қайтди. Эдвин ўғлига бор маҳоратини, айниқса, пенальти қайтариш сирларини ўргатмоқда.

Ҳимоя:

Нил Киоун - 19 ёш, "Рединг" Унинг отаси Мартин Киоун, ўз фаолиятининг катта қисмини "Арсенал"да ўтказиб, жаҳонга танилган эди. Ўз даврида Англия терма жамоасига ҳам мунтазам равишда чақириб турилган футболчи, ўз каръерасини "Рединг"да якунлайди. Табиийки, ўғлининг каръераси ҳам шу жойда бошланади. Ҳозирда у жамоанинг ёшлари таркибида марказий ҳимояда ҳаракат қилмоқда.

Кристиан Мальдини - 18 ёш, "Милан" "Милан"да 3-рақам Мальдинилар сулоласига тегишли. Чезаре ва Паоло Мальдинилар узоқ йиллар давомида шу рақамли либосда жамоа шарафини ҳимоя қилиб келишган. Ҳозирги кунда, ижара асосида "Брешиа"да тўп сураётган Кристиан, вақти келиб отаси ва бобосининг жойида ҳаракат қилишига ишонч билдирсак бўлади.

Диего Пойет - 19 ёш, "Вестхем" Густаво Пойет ўзининг энг яхши даврларини фаолияти тугаб бораётганида ўтказган, яъни, 30 ёшида "кашф этилган". У "Сарагоса"дан "Челси"га ўтганида айнан 30 ёшда эди. Унинг ўғли эса ҳозирданоқ ўзини кўрсата бошлади. "Вестхем" уни мавсум аввалида "Чарлтон"дан 500 минг фунт-стерлинг эвазига харид қилди ва АПЛ ўйинларида ҳам майдонга туширмоқда. Ҳозирги кунда "Сандерлаенд"ни бошқараётган Густаво Пойет ўғли ҳақида жуда яхши фикрлар билдиради: "У футбол ичида яшайди, ухлаганда ҳам, нафас олганда ҳам футбол ичида, у ўз ҳаётини ўйинларсиз тасаввур ҳам қила олмайди".

Ярим ҳимоя

Жастин Клюверт - 15 ёш, "Аякс" Собиқ ҳужумчининг ўғли чап қанот яримҳимоячиси бўлишни танлаган. Жастин Голландия ўсмирлар жамоасида ўзининг ёрқин ўйинлари билан ҳам мутахассислар назарига тушган. У отаси каби марказий ҳужумчи эмас, вингер бўлса-да, отаси каби техникага, отаси каби тезликка ва отаси каби гол сезиш қобилиятига эга. Бош билан ўйнаганда ҳам отасини эслатиб туради.

Энцо Зидан - 19 ёш, "Реал Мадрид" Буюк Зиданнинг ўғлининг фамилияси Зидан эмас, балки, Фернандес, лекин, унинг футболкасига шунчаки "Энцо" деб ёзиб қўйилган. Ва уни ҳеч ким Энцо деб эмас, "Кичкина Зидан" деб чақиради. Чунки, Энцо отасининг барча финтларинипухта ўзлаштириб, интернетда тарқалган видеороликлар орқали машҳур бўлиб кетди. Унинг жонли ўйинларини ҳам ёшлар ўртасидаги ЕЧЛ учрашувларида кузатиш мумкин.

Янис Хаджи - 15 ёш, "Виториул Константа" Кичик Хаджи ҳозирча отаси Георги Хаджи 2009 йилда ташкил қилган камтаргина румин клубида шуғуланмоқда. У отаси каби плеймейкер амплуасида ҳаракат қилади, жарима зарбаларини ижро этишда ҳам отасидан ўрнак олган.

Ҳужум

Деванте Коул - 19 ёш, "Манчестер Сити" Деванте ўтган аср охири ва янги аср бошида "МЮ" да порлаган Энди Коулнинг ўғли бўлади. У етти ёшидан "Сити" академиясида футбол сир-асрорларини ўрганишни бошлаган. Ўтган йили ёшлар ўртасидаги ЕЧЛ да “шаҳарликлар” жамоаси сафида 5 та ўйинда иштирок этиб, 6 та гол уришга эришди. Бу мавсумда эса, "Барнсли" клубида ижара асосида ўйнамоқда.

Жованни Симеоне - 19 ёш, "Ривер Плейт" Жованни Симеоне яқин келажакда "Атлетико" жамоасида ўйнай бошлаш мақсадида эканини яшириб ўтирмайди. Бу жуда мушкул кўриниши мумкин, лекин, ёш Симеоне отасининг назарига тушиш учун бор кучи билан интилмоқда. У аллақачон Аргентина чемпионатида мухлислар ёқимтойига айланиб улгурган бўлса, яқинда миллий терма жамоада ҳам дебют қилди. Унинг майдондаги лақаби - "самурай".

Ромариньо - 21 ёш, "Бразилиенсе" Ромарионинг ўғли ҳақида отаси каби футбол оламига ёриб кирди дея олмаймиз. У ҳозирги кунларда Бразилиянинг қуйи лигасида, "Бразиленсе" билан юқори лигага чиқиш учун ҳаракат қилмоқда. Унинг жамоадаги биринчи учрашувини кузатиш учун отаси Қатардан етиб борди ва ўнлаб қариндошлари билан бирга ўтириб, ўғлининг ўйинини кузатди. Ўша ўйинда "Бразиленсе" "Бразилиа"ни қабул қилиб, 0:2 ҳисобида ютқазган ва кичик Ромарио захирадан майдонга туширилган эди. Ромариньонинг асосий хусусияти - ўзига хос финтларидир. Биз уни Европада кутамиз.

Ривалдиньо - 19 ёш, "Можи Мирим" Ривальдо ва Ривалдиньо ўтган йили бир жамоада, Ривальдонинг хусусий жамоасида биргаликда ҳаракат қилишган эди. Кичик Ривальдо ҳам тўп билан муомала қилишда отасидан қолишмаслигини кўрсатиб қўйган. Ҳозирда у жамоанинг асосий ҳужумчиси ҳисобланади.

ramziy-termajamoa



МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2019 XABARDOR.UZ