“Бунёдкор” футбол клуби бош мураббий ўзгарди. Мазкур ўзгариш клуб президенти Меҳриддин Абдуллаев иштирокидаги мажлисда маълум қилинган.

Қайд этилишича, “Бунёдкор” клуби тарихида Суперлиганинг 6-тури доирасида “Олимпик”ка ютқазиб, ўз майдонидаги энг йирик ҳисобдаги мағлубиятга учрагани (1:5)дан сўнг клуб раҳбарияти мураббийлар штаби олдига “Навбаҳор”га қарши навбатдаги баҳсда ғалаба қозониш вазифасини қўйган эди. Аммо “қалдирғочлар” Наманганда мағлубиятга учраб қайтган.

Навбатдаги мағлубиятда “муносиб қаршилик кўрсата олганлари” сабаб клубнинг мураббийлар штабига яна имконият берилган. Бироқ, кеча, 10 май куни Суперлиганинг 8-турида “Металлург” жамоаси билан куч синашган “Бунёдкор” яна муҳим очколарни бой берди. Ушбу учрашувдан сўнг клуб раҳбарияти томонидан мураббийлар штабида ўзгаришлар амалга ошириш бўйича қарор қабул қилинган.

– “Бунёдкор”нинг обрўсига бу асло ярашмайди. Мен мураббий ва футболчилардан шуни сўрардим ва истардимки, ҳар бирингиз ҳар сафар ўйинга чиққанингизда фидойилик кўрсатиб, ижобий натижа учун жонингизни бериб курашинг. Фақат шундагина зафар қучиш мумкин. Жамоанинг ҳозирги ҳолати эса қониқарли даражада эмас, – дейди клуб президенти Меҳриддин Абдуллаев.

Шундан сўнг “Бунёдкор” мураббийлар штабида бир қатор ўзгаришлар амалга оширилди. Жумладан, бош мураббий Шуҳрат Мақсудов, мураббий Арам Ананян ва дарвозабонлар мураббийи Абдусаттор Раҳимов ўз лавозимларини тарк этишлари эълон қилинди.

Шу кунга қадар бош мураббий ассистенти бўлиб ишлаб келган Виктор Карпенко бош мураббий вазифасини бажарувчи этиб тайинланди.

Анвар Ғофуров бош мураббий ассистенти лавозимига ўтказиладиган бўлди. Руминиялик Августин Чирита эса жисмоний тайёргарлик бўйича мураббий сифатида ишини давом эттиради.

Мураббийлар штабидаги бўш ўринларга номзодларни кўриб чиқиш Виктор Карпенко зиммасига юклатилди. Виктор Александрович тез кунларда клуб раҳбариятига бу борадаги ўз таклифларини киритиши лозимлиги таъкидланди.

• Бунёдкор
• Тайинлов