Каттами, кичикми – фотоаппаратнинг ҳар қандай тури кам пул турмайди. Ундаги энг муҳим қисм бу унинг объективи ҳисобланади. Хира тортган, қирилган объектив билан суратларингиз тиниқ чиқмайди, сифати пасаяди. Бундай бўлишини истамасангиз, уларни тўғри парваришланг. Объективнинг уч асосий душмани – чанг, намлик ва моғор ҳисобланади.

Ультрабинафша фильтрлардан фойдаланинг

Сифатли ультрабинафша фильтр камера линзасини чанг, намлик ва ҳатто урилишлардан сақлайди. Агар қиммат объектив олган бўлсангиз ультрабинафша фильтрли шишалар айни муддао.

Объективни алмаштиришда эҳтиёткор бўлинг

Фотоаппаратга объективни улаш ёки ажратиш вақтида маҳкамланувчи камера механизмига чанг-ғубор, намлик тушиб қолиши мумкин. Шунинг учун объективни ажратаётганда қурилма тешигини доим пастга қаратган ҳолда ажратинг. Юрганда объективни алмаштириб юрмаслик учун қандай масофада суратга олишингизни аввалдан ўйлаб олинг.

Қурилма учун махсус сумка, микрофибра ва силикагел сотиб олишни унутманг

Ҳар бир буюмнинг ўз идиши бўлгани яхши. Фотоаппарат сумкасида объектив учун алоҳида жойлар бўлиши ва улар ерга тушишдан ҳимояловчи хомашёдан тайёрланган бўлиши зарур. Микрофибра эса қурилмаларни тозалаш учун керак бўлади. Фотоаппаратда кир йиғилиб қолса, у линзаларга ҳам туша бошлайди. Қурилмаларни намлик ва моғордан сақлаш учун сумкага силикагел қопчаларини солиб қўйинг. Уларни вақти-вақти билан алмаштириб туришни унутманг.

Линзани эҳтиётлик билан тозаланг

Линзаларни тозалаш учун суюқлик ишлатиш мумкин эмас. Йиғилган чангни махсус чўтка ёки ҳуқна ноки билан амалга оширинг. Тозалаш воситаларини доим ёнингизда олиб юринг. Фотоаппаратни доим бўйинга осиб юринг. Бу уни ерга тушиб ёки урилиб кетишдан сақлайди.

Линзага пуфламанг, бармоқ билан тегинманг

Айримлар объектив линзасини оғиз билан пуфлаб, кийимининг чети билан артиб тозалашга ҳаракат қилади. Бу объективнинг қирилишига ёки янада кўпроқ доғ пайдо бўлишига сабабчи бўлади. Бу борада сизга микрофибра ёрдам беради. Агар линзага сув теккан бўлса, яна микрофибра матоси билан тезгина артиб ташланг.

• Фойдали
• Tavsiya
• қизиқарли