Ҳиндистон аҳоли сони бўйича Хитой Халқ Республикасини ортда қолдирди. Бу ҳақда “Bloomberg” нашри хабар берди.

Қайд этилишича, World Population Review (WПР) маълумотларига кўра, Ҳиндистон аҳолиси 2022 йил якуни бўйича 1,417 миллиард кишини ташкил этди, бу Хитойдагидан 5 миллионга кўп, ХХР аҳолиси расмий маълумотларга кўра, 1,412 миллиардни ташкил этмоқда.

Бирлашган Миллатлар Ташкилоти Ҳиндистон аҳоли сони бўйича Хитойни ортда қолдириб, дунёдаги энг кўп аҳолига эга мамлакатлар рейтинги бўйича етакчи бўлишини башорат қилган эди, аммо бу кейинроқ амалга ошиши кутилган эди. WPR маълумотларига кўра, 18 январь ҳолатига кўра, Ҳиндистон аҳолиси янада кўпайган ва 1,423 миллиард кишини ташкил қилган. “Macrotrends” тадқиқот платформаси маълумотлари ҳам, бу кўрсаткич 1,423 миллиард кишмга етганини тасдиқлайди.

Ҳиндистон расмий равишда аҳоли сонининг янги рақамларини эълон қилмаган. Мамлакатда одатда ҳар 10 йилда бир марта аҳолини рўйхатга олиш ўтказилади, аммо 2021 йилда у пандемия сабабли қолдирилди.

ХХР Давлат статистика бюроси маълумотларига кўра, 2022 йилда Хитой аҳолиси ўтган йилга нисбатан 850 минг кишига камайган ва 1 миллиард 411 миллион 750 минг кишини ташкил қилган. Хитой аҳолиси 1960 йилдан бери биринчи марта қисқарди.

БМТ прогнозига кўра, Ҳиндистон ва Хитой ўртасидаги аҳоли сони бўйича тафовут яқин йилларда сезиларли даражада ошади. 2050 йилга бориб, ташкилот маълумотларига кўра, Ҳиндистон аҳолиси 1,688 миллиард кишига етади, у пайтга келиб Хитойда 1,317 миллиард аҳоли истиқомат қилади.

Умуман олганда, аҳоли сонининг энг катта ўсиши Конго Демократик Республикаси, Миср, Эфиопия, Ҳиндистон, Нигерия, Покистон, Филиппин ва Танзанияда кутилмоқда. Бирлашган Миллатлар Ташкилоти маълумотларига кўра, ушбу мамлакатлар 2050 йилга бориб бутун дунёда кутилаётган аҳоли сонининг ярмидан кўпроғини ташкил қилади.

• БМТ
• Ҳиндистон
• Хитой
• aholi soni