Бирлашган Араб Амирликларининг “Масдар” компанияси томонидан вилоятнинг Томди туманида қуввати 500 МВт бўлган шамол электр стансияси қурилмоқда.

“Масдар” ва Хитойнинг “Голдwинд” компаниялари ўртасида Навоий вилоятининг Томди туманида қурилаётган шамол электр стансияси учун 111 та турбинани етказиб бериш бўйича шартнома имзоланган.

Шунга кўра, Хитойнинг Ланжоу шаҳридан Ўзбекистонда қурилаётган шамол электр стансияси учун шамол генератор ва турбиналари махсус транспорт воситалари орқали олиб келинмоқда.

Мазкур электр стансия жорий йил якунида ишга туширилади ва у Марказий Осиёдаги энг йирик шамол электр стансияси бўлиб ҳисобланади.

Стансия тўлиқ ишга туширилгач, йилига 1 млрд 800 млн кВт.соат электр энергияси ишлаб чиқарилади. Бунинг натижасида йилига 540 млн куб метр табиий газ тежалишига эришилади ва атмосферага 720 минг тонна зарарли газлар чиқишининг олди олинади.

Эслатиб ўтамиз, ушбу йирик лойиҳа Президентнинг 2020-йил 22-декабрдаги қарори асосида амалга оширилмоқда.

• БАА
• Elektr stansiya
• Навоий
• Хитой