2021 йил 16 ноябрь куни Ташқи ишлар вазири Абдулазиз Комилов бошчилигидаги Ўзбекистон Республикаси делегациясининг Брюсселга ташрифи доирасида Европа Иттифоқининг Ташқи ишлар ва хавфсизлик сиёсати бўйича Олий вакили, Европа Комиссияси вице-президенти Жосеп Боррел билан учрашув ўтказилди.
Кенгайтирилган шериклик ва ҳамкорлик тўғрисидаги битим бўйича музокараларни тезроқ якунлаш, шунингдек, Ўзбекистон ва Европа Иттифоқи ўртасидаги савдода «ГСП+” механизмидан самарали фойдаланиш муҳимлиги қайд этилди.
Бўлажак икки ва кўп томонлама тадбирларга, жумладан, «Ўзбекистон – Европа Иттифоқи» парламент ҳамкорлиги қўмитаси йиғилиши, «Европа иттифоқи – Марказий Осиё» вазирлар учрашуви, «Европа Иттифоқи – Марказий Осиё туризм форуми» ва бошқа тадбирларга ҳар томонлама ва сифатли тайёргарлик кўриш бўйича келишувга эришилди.
Афғонистонда юзага келаётган вазият юзасидан атрофлича фикр алмашилди. Шунингдек тадбир давомида Абдулазиз Комилов «Bryussel morning» мухбири Садид Лаилуманиниг саволларига жавоб берди.
Садид Лаилума – «Bryussel morning» нашри журналисти:
- Менга савол бериш имкониятини берганингиз учун катта раҳмат. Ўзбекистон ташқи ишлар вазирига саволим бор. Шу уч ой давомида Ўзбекистон ҳукуматининг юқори мартабали аъзолари Афғонистонга бир неча бор ташриф буюрди. Шунингдек, Толибон ва Ўзбекистон ўртасидаги муносабатлар 1997 йилдан бери, менимча, озми-кўпми очиқ дейишимиз мумкин.
Афғонистон келажакни қандай кўрасиз ва Толибон бошқа гуруҳларни ўз мамлакатига киритмаган ҳолда ташкил қилган вазирлар маҳкамасига қандай муносабатдасиз. Мен улар инклюзив ҳукумат деб атайдиган нарсани назарда тутяпман, лекин аслида ундай эмас.
Ўзбекистон Афғонистондаги бошқа миллатлар ва аёлларга имкон берилмаётганлиги ҳақида улар билан музокара ўтказмоқчими? Бу мамлакатнинг келажагини қандай кўрасиз? Ва шунингдек, электр таъминоти ҳақида? Ушбу йўналишда ҳам ишлашни давом эттириш имконияти борми? Раҳмат.
Абдулазиз Комилов – Ўзбекистон Республикаси Ташқи ишлар вазири:
- Бу муҳим савол учун раҳмат. Биз Афғон масаласида Ўзбекистоннинг позициясини бир неча бор билдирганмиз. Шу муносабат билан мен буни яна бир бор такрорламоқчи эмасман. Мен нимадан қочиш кераклигини ва бизнинг фикримизча, нима қилиш кераклигини айтиб бермоқчиман.
Биринчидан, Афғонистон халқаро ҳамжамиятдан ажратилган ҳолда қолмаслиги керак. Коалиция қўшинларининг бу мамлакатдан олиб чиқилиши Афғонистон келажаги учун умумий манфаатлар ва жамоавий масъулият йўқолишини англатмаслиги керак.
Иккинчидан, Афғонистон босқинчи давлатга айланмаслиги керак.
Учинчидан, Афғонистондаги уруш ноҳарбий усуллар билан давом эттирилмаслиги керак. Бу ерда мен активларни музлатиш, барқарор инсонпарварлик ёрдами ва уни етказиб беришдаги кечикишларни назарда тутяпман, бу эса Толибонни ўзини изоляция қилиш сиёсатини олиб боришга ундамоқда.
Энди бу вазиятда нима қилиш керак?
Биринчидан, Афғонистондаги мавжуд воқеликни ва кучларнинг янги мувозанатини тан олиш муҳим. Афғон муаммоси юкини минтақа давлатлари, айниқса, энг яқин қўшнилар елкасига юкламаслик керак.
Иккинчидан, Афғонистонда гуманитар инқирознинг олдини олиш зарур. Афғонистоннинг хорижий банклардаги активларини музлатиб қўйиш ва транзакцияларни тиклаш керак.
Учинчидан, шу билан бирга, биз аниқ айтишимиз керакки, Толибоннинг тан олиниши маълум шартларга боғлиқ: барча гуруҳларнинг кенг вакилларига асосланган ҳукумат тузиш, асосий инсон ҳуқуқларини таъминлаш, яхши қўшничилик сиёсатини юритиш, терроризмга қарши кураш, гиёҳванд моддалар савдоси, уюшган жиноятчилик ва ҳоказо.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!