Бир неча кун аввал нашримиз томонидан Ўзбекистонлик айрим фуқаролар Қирғизистон расмийларига Ўш шаҳрида фаолият юритаётган таксичилар устидан шикоят қилишгани, Ўзбекистон Ташқи Ишлар вазирлиги ва Ташқи меҳнат миграцияси агентлиги Xabardor.uz га бу воқеадан бехабар эканлигини маълум қилгани ҳақида материал чоп этилган эди.

Шундан сўнг, маълум бўлишича, бугун Қирғизистон Президенти Жапаровнинг Ўш вилоятидаги вакили Зиядин Жамалдинов Ўшда маҳаллий полиция, чегара ва божхона хизматлари вакиллари иштирокида мажлис ўтказган.

«Биз Ўш аэропорти орқали ҳаракатланаётган хорижлик ва қирғизистонлик фуқароларнинг хавфсизлигини таъминлашимиз керак», – деган у.

Тушдан кейин Ўш аэропортида хавфсизликни таъминлашга қўшимча битта милиция ротаси ва махсус полк ҳарбийлари жалб қилингани ҳақида маълумот тарқалган.

Шу кунгача аэропортни фақат транспорт милицияси қўриқлаб келган.

Хабарларда шунингдек, Дўстлик постидан Ўш аэропортигача маршрут қатнови йўлга қўйилиши ҳақида таклифлар илгари сурилган.

• Президент
• Қирғизистон