Самарқанд ва Сирдарё вилоятларида фуқароларни аввал хорижий ўқишга киргизиб, кейин ўқишни Ўзбекистонга кўчириб беришни ваъда қилган фирибгарлар ушланди. Бу ҳақда Иқтисодий жиноятларга қарши курашиш департаменти хабар берди.
Қайд этилишича, Бош прокуратура ҳузуридаги Департаментнинг Ургут туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбир давомида аниқланишича, Д.В. исимли фуқаро бошқа бир А. исимли фуқарони танишлари орқали Қозоғистон Республикасидаги университетлардан бирига тўғридан-тўғри 3-курсига ўқишга киритиб, кейинчалик ўқишини Ўзбекистонга кўчириб беришни айтган. Бунинг эвазига эса, 3 500 АҚШ доллари сўраган.
Шундан сўнг, фуқаро Д.В. келишилган пулларни олган вақтида ҳуқуқ тартибод ходимлари томонидан қўлга олинган.
Шунингдек, Д.В. фуқаро M.ni қўшни Тожикистон Республикасидаги университетга ўқишга киритиб, Ўзбекистонга кўчириб бериш эвазига 3 000 АҚШ доллари олганлиги ҳам аниқланган.
Бундан ташқари, Департамент ҳамда ДХХнинг Гулистон тумани бўлимлари томонидан ўтказилган тезкор тадбирда, фуқаро Ф.Г. бошқа бир фуқаро R.ni танишлари орқали Украина Республикасидаги университетлардан бирида ўқиётганлиги ҳақида ҳужжат қилиб, ўқишини Гулистон Давлат университетига кўчириб бериш эвазига 3 200 АҚШ доллари сўраб, шундан 1 500 АҚШ долларини олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!