Нидерландияда давом этаётган «Tata Steel Chess-2023» турнири ҳал қилувчи паллага кирди. Кеча турнирнинг 11-тури бўлиб ўтди.

Мастерс гуруҳи пешқадами Нодирбек Абдусатторов ўзининг асосий таъқибчиси, 2-ўриндаги Аниш Гири билан дуранг қайд этди.

Шу тариқа, Нодирбек 7,5 очко билан пешқадамликни сақлаб қолди. Аниш Гири ҳисобида эса 7 очко бор.

3-ўриндаги Магнус Карлсен ҳам мусобақанинг жиддий иштирокчиларидан бири бўлган Уэсли Со билан дуранг ўйнади. Магнус Нодирбекдан ҳамон 1 очко ортда қолмоқда. Бугун, 28 январь куни Нодирбек америкалик Уэсли Со билан ўйнайди.

Чалленжерс гуруҳидаги Жавоҳир Синдоров ҳам кеча Макс Вармердам билан дуранг ўйнади.

Айни пайтда Синдоров 11 имкониятдан 7 очко жамғариб, учинчи ўринни эгаллаб турибди. Жадвалда германиялик Александр Донченко 8 очко билан пешқадамлик қиляпти, туркиялик Мустафо Йилмаз 7,5 очко билан иккинчи бўлиб турибди.

Бугун Жавоҳир асосий таъқибчиси Муҳаммад Амин Табатабаи билан куч синашади.

Эслатиб ўтиш мумкин, жами 13-турдан иборат бўладиган турнирнинг якунлашига яна 2 та тур қолди. Эртага, 29 январь куни чемпион номи маълум бўлади.

• Нидерландия
• Nodirbek Abdusattorov
• Шахмат