Хитойлик археологлар Шан сулоласи даврида тириклайин кўмиб юборилган аскарлар қабрини топишди. Уларнинг милоддан аввалги 1600-1046 йилларда кўмилгани тахмин қилинмоқда. Айнан мана шу даврда Хитойда Шан сулоласи вакиллари ҳукмронлик қилишган.

24 нафар аскарга тегишли бўлган қабрлар Шан сулоласи даврида Хитой пойтахти бўлган Ин шаҳри яқинидаги қадимий Анян шаҳри ҳудудидан топилган.

Аскарлар ҳарбий аравалар ва отлар билан бирга жанговар кийимларда дафн этилган. Жангчиларнинг бошидаги дубулғаларга чиғаноқлар билан безак берилган, отларнинг пешона қисмидаги безаклар эса олтин ва бронзадан ишланган. Археологлар ҳудудга дафн этилган аскарлар араваларга боғланган ҳолатда тириклай кўмилган деган хулосага келишган.

Маълум қилинишича, Шан сулоласи даврида хўжайинлар ўлимидан кейин унинг хизматчилари ва аскарларини тириклайин кўмиш одатий ҳол ҳисобланган. Бу аскарлар ва хизматчиларнинг ўз хоҳишларига кўра амалга оширилган.

Анян шаҳри археологлари ҳудудни 2 йилдан бери ўрганишади. Мутахассислар бу ердан жангчиларга тегишли қабрлардан ташқари нефрит, чиғаноқ ва суякдан ишланган тарихий буюмларни ҳам топишган.

• Тарих
• қизиқарли