“Narkokuryer” er-xotin giyohvandlik moddalarini blogerdan olib sotayotganini aytmoqda

  • 08:26 / 20.02.2020
  • 898

Foto: IIBB

Toshkent viloyati IIBB tezkor xodimlari tomonidan o‘tkazilgan tadbir davomida, giyohvandlik vositalarini internet orqali sotib olib, chegaradan maxsus yasalgan oyoq qiyimning poshna qismiga olib o‘tib biznes qiluvchi, er-xotinning noqonuniy savdosiga chek qo‘yildi. 

Xabardor.uz’ga ma’lum qilinishicha, IIBB JQB tezkor xodimlari hamda YHXB inspektorlari bilan hamkorlikda o‘tkazilgan tadbir davomida, Chirchiq shahri "Intizor" ko‘chasi bo‘ylab harakatlanayotgan oq rangli Spark rusumli avtoulovi to‘xtatilib, avtomashina haydovchisi R.Yu.ning hujjatlari tekshirilganda, haydovchi o‘zini shubhali tutib, noo‘rin xatti-harakatlar qilganligi sababli, avtoulov saloni xolislar ishtirokida ko‘zdan kechirilgan. Ko‘zdan kechirish davomida avtoulov saloni ichida 3 dona gugurt qutilarga qadoqlangan jami 12 gr. “marixuana” giyohvandlik vositasi, 10 dona oq rangli qog‘oz bo‘laklariga o‘ralgan jami 6,2 gr “spice” sintetik giyohvandlik vositasi borligi aniqlanib, xolislar ishtirokida daliliy ashyo sifatida olingan. 

Shundan so‘ng, tezkor tadbir davom ettiriladi. Haydovchi ushbu giyohvandlik vositalarini Chirchiq shahrida yashovchi o‘zining tanishlari er-xotin B.M. va A.X.lardan olganligi ma’lum qiladi.

B.M. va A.X. larning jinoiy faoliyatiga chek qo‘yish maqsadida o‘tkazilgan tadbir natijasida, ular maxsus xaridorga 1 million 500 ming so‘m pul evaziga 9,2 gramm “spice” sintetik giyohvandlik moddasini sotayotgan vaqtida ashyoviy dalillar bilan qo‘lga olinadi. Uning yashash xonadoni ko‘zdan kechirilganda, xonadonida bo‘lgan F. I. dan 1,10 va uyidan 5,46 gramm “spice” sintetik moddasi borligi aniqlanib, daliliy ashyo sifatida olingan.

Ushbu olingan giyohvand va psixotrop moddalarini manbasini aniqlash bo‘yicha olib borilgan surishtiruv ishlari natijasida, B.M. ning xotini A.X. yuqorida keltirilgan 12 gramm marixuana va 20 grammdan ortiq “spice” sintetik giyohvandlik moddalarini Qozog‘istonlik bo‘lgan ijtimoiy tarmoq blogeridan olib, doimiy ravishda O‘zbekiston bojxona chegara maskanlaridan, maxsus tayyorlangan oyoq kiyimining poshnasiga (konteyner) yashirgan holda olib o‘tganligi aniqlangan.

Mazkur holat yuzasidan Chirchiq shahar IIB huzuridagi Tergov bo‘limi tomonidan O‘zbekiston Respublikasi JKning 273-moddasi 5-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.