Har yilning 24-dekabr kuni butun dunyoda optimistlar kuni nishonlanishidan xabaringiz bormi? Ushbu bayramni aynan kim oʻylab topgani aniq emas. Ammo, uni ajoyib bayram deb ishonch bilan aytish mumkin.

Nima uchun hayotda optimizm muhim?

Optimizm har doim ijobiy hayollar bilan yurish, kulib yashashga imkon beradi. Optimist insonlar maqsadlari tomon har qachon ildam qadam tashlashga oʻzlarida kuch topa olishadi, hamma narsadan yaxshi natija kutishadi. Bu esa ularni pessimistlarga nisbatan baxtliroq hayot kechirishlariga imkon beradi.

Optimistlar koʻproq umr koʻrishadi

Har doim yaxshi narsalar haqida oʻylab, yaxshilikka umid qilib yuradigan odamlarning salomatligi boshqalarnikiga nisbatan yaxshiroq boʻlishi fanda isbotlangan. Tadqiqotlarning koʻrsatishicha, optimistlar pessimistlarga nisbatan oʻrtacha hisobda 10 yilga koʻproq umr koʻrishadi. Optimistlar salomatliklari bilan bogʻliq muammolar kelib chiqqan holatda ham uni bartaraf etish uchun choralar koʻra boshlashadi, pessimistlar esa koʻp hollarda kasalliklardan tushkunlikka tushib qolishadi.

Optimistlarning muhabbat bobida omadlari koʻproq chopadi

Juftliklardan hech boʻlmasa birining optimist ekani munosabatlarning mustahkam va davomli boʻlishini taʼminlaydi. Optimistlar hamma narsani, atrofdagi odamlarni ham mukammallashtirishga harakat qiladi, bu ularning boshqalarga nisbatan baxtliroq yashashlariga yordam beradi. Ular tanlagan yorlaridagi kamchiliklarga koʻz yuma olishadi, pessimistlarda esa buning teskarisi kuzatiladi.

Optimistlar hayotda koʻproq narsalarga erishishadi

Aynan mana shu mavzuda suzish bilan shugʻullanuvchi sportchilar orasida tadqiqot oʻtkazilgan. Birinchi urinishda murabbiy ularga notoʻgʻri natijalarni eʼlon qilgan, har bir ishtirokchining natijasiga 2 soniyadan vaqt qoʻshib aytilgan. Natijalar ularning barchasini birday xafa qilgan.

Ikkinchi urinishda pessimistlar avvalgiga nisbatan 1,6% ga sekinroq, optimistlar esa 0,5% tezroq suzganlari qayd etilgan.

Qanday qilib optimistga aylanish mumkin? Optimizm tomon 3 qadam

1. Kuningizni yaxshi kayfiyatda boshlang. Uygʻonganingizdan keyin bir necha daqiqa davomida yaxshi narsalar toʻgʻrisida oʻylang, sizga baxt hissini bera oladigan odamlar va narsalar haqida xayol qiling. Tonggi kayfiyat kun davomida ham saqlab qolishiga aslo shubha qilmang.

2. Atrofingizdagi pessimist odamlardan uzoqlashing. Bizni qurshab turgan odamlar ruhiy holatimizga ham juda katta taʼsir koʻrsatadi. Biz ulardan ijobiy quvvat bilan bir qatorda salbiy quvvatni ham tortib olamiz. Kun davomida hayotdan noliydigan odam bilan birga boʻlsangiz, tez orada sizda optimizm ruhidan asar ham qolmaydi. Har doim optimistlar davrasida boʻling, pessimistlardan esa uzoqlashing.

3. Shukrona ayting. Bugungi holatingiz, salomatligingiz, atrofingizdagi odamlar, hayotingizdagi imkoniyatlar uchun shukrona ayting. Tinimsiz ravishda shukrona aytish – dunyoqarashingizni tubdan oʻzgartirib yuborishga qodir. Bu oʻzingizni har doim his qilishga, diqqatingizni ijobiy narsalarga qaratishga yordam beradi.

• Foydali
• qiziqarli