O‘zbekiston Musulmonlari idorasining Umra ziyoratiga oid xabarnomasi eʼlon qilindi.
Idoraga ko‘ra, shu kunga qadar “Umra-2020” mavsumida safar xarajatlarini to‘liq amalga oshirgan, lekin pandemiya sababli ziyoratga bora olmagan fuqarolar Umra ziyoratiga yuborilmoqda.
Qayd etilishicha, shu yilning 17-mart holatiga 21 mingdan ortiq ziyoratchi, Saudiya Arabistoniga jo‘natilib, ulardan 16 ming nafardan ziyodrog‘i umra amallarini to‘liq ado etib, O‘zbekistonga qaytib kelishgan.
“Hozirda 5 ming 600 nafarga yaqin ziyoratchi Saudiya Arabistonida Umra ziyoratlarini amalga oshirmoqda”, – deyiladi O‘MI xabarnomasida.
O‘MI, shuningdek, hozirgi kunda Saudiya Arabistonida karantin talablari yumshatilayotgani hamda Podshohlik tomonidan barcha davlatlar – Turkiya, Malayziya, Indoneziya, Eron va Misr kabi yirik musulmon mamlakatlariga Umra ziyorati uchun ruxsat berilganini taʼkidlaydi.
Shu bilan birga, Idora yuqoridagi sabablarga ko‘ra, ayrim Umra tadbirlarining narxlari qimmatlashishi mumkinligiga ishora qilmoqda.
“Bu, o‘z navbatida, hozirgi kunda Saudiya Arabistonida mehmonxona va boshqa turdagi servislarga talab oshishiga, xususan, Ramazon oyida tashkil etiladigan Umra tadbirlarining narx-navosiga ham taʼsir ko‘rsatishiga sabab bo‘ladi”, – deyiladi xabarnomada.
Maʼlumot uchun, joriy yil 5-mart kunidan eʼtiboran, Podshohlikka PZR test javobisiz kirish hamda oraliq masofani saqlash tartibi bekor qilindi. Endilikda Saudiyadan O‘zbekistonga kelayotgan ziyoratchilardan ham PZR testi talab etilmaydigan bo‘ldi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!