Forbes 2013-yilda Izabel dos Santosni Afrikaning eng boy ayoli deb topgan.
AQSh Angola sobiq Prezidentining Bakuda tug‘ilgan qizi, 2021-yilning yanvarigacha Forbes milliarderlari ro‘yxatida bo‘lgan Izabel dos Santosga nisbatan sanksiyalar joriy qilgan. AQSh davlat kotibi Entoni Blinkenning bayonotida aytilishicha, “Angola davlat korxonasining sobiq raisi”ga qarshi sanksiyalar” uning shaxsiy maqsadlarda davlat mablag‘larini o‘g‘irlash yo‘li bilan yirik korrupsiyaga aloqadorligi uchun” joriy etilgan. Bu haqida Forbes yozqmoqda.
Shuningdek, AQSh davlat kotibi Blinken sanksiyalar “Magnitskiy qonuni” doirasida kiritilayotganini ta’kidlagan. Xususan, sanksiya ro‘yxatiga kiritilgan shaxslar va ularning yaqin qarindoshlarining AQShga kirishi taqiqlangan.
Ma’lumotlarga ko‘ra, Izabel dos Santos 1973-yilda Bakuda Joze Eduardu dos Santos oilasida tug‘ilgan. O‘sha paytda Joze Eduardu Angolani ozod qilish uchun xalq harakati faoli bo‘lgan. Keyinchalik Izabelning otasi Angolaning Prezidenti bo‘ldi va 1979-yildan 2017-yilgacha mamlakatni boshqardi.
2013-yilda Forbes Izabel dos Santosni Afrikaning eng boy ayoli deb topdi, o‘shanda uning boyligi 3,5 milliard dollarni tashkil qilgan. Xalqaro tadqiqotchi-jurnalistlar konsorsiumi (ICIJ) ma’lumotlariga ko‘ra, dos Santos va uning turmush o‘rtog‘ining biznes imperiyasi 400 dan ortiq kompaniyalarni o‘z ichiga olgan. O‘sha kompaniyalar Angola hukumati orqali milliardlab dollar shartnomalarni qo‘lga kiritgan.
Ta’kidlanishicha, Izabelning otasi, ya’ni Angola Prezidenti iste’foga chiqqanidan keyin mamlakatda unga qarshi tergov boshlandi. Afrikaning eng badavlat ayoli davlatga qarashli Sonangol neft kompaniyasining rahbari bo‘lib ishlagan vaqtida pul o‘marish va pul yuvishda ayblangan. O‘z navbatida, tadbirkor bu ayblovlarni rad etgan. 2019-yil oxirida Angola va Portugaliyada dos Santos va uning erining aktivlariga blok qo‘yildi (2020-yil noyabr oyida eri vafot etdi).
Qayd etilishicha, 2021-yil boshida Izabel dos Santos milliarderlar reytingidan chiqib ketdi — Forbes dos Santosning moliyaviy holatini 1 milliard dollardan kam, deb baholadi.
Blinken bir vaqtning o‘zida Kolumbiya, Gvatemala, Nikaragua, Salvador, Liberiya, Angola va Ukrainaning ham bir necha fuqarosiga nisbatan sanksiyalar qo‘llanilishini e’lon qilgan. Ukrainalik Aleksandr Tupiskiy “jiddiy korrupsiya harakatlari, jumladan, Ukraina sud tizimida xizmat qilayotgan vaqtida pora olgani uchun” ro‘yxatga kiritilgan. Biroq Tupiskiy Ukrainaning Konstitusiyaviy sudi saytida hali ham rais sifatida ro‘yxatda turibdi.
Bundan tashqari, Blinken o‘z bayonotida Qo‘shma Shtatlar Xalqaro korrupsiyaga qarshi kurash kuni — 9-dekabr munosabati bilan “korrupsiyaga qarshi kurash bo‘yicha qo‘shimcha dadil choralar” ko‘rayotgani va shu bilan milliy xavfsizlikning ustuvor yo‘nalishi sifatida korrupsiyaga qarshi kurashning rolini oshirishga sodiqligini yana bir bor tasdiqlayotganini qayd etgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!