Amerikalik aktyor Alek Bolduin “Zang” filmini suratga olish jarayonida sodir boʻlgan fojiadan keyin ilk marta intervyu berdi. Aktyor jurnalist bilan suhbat davomida pistolet tepkisini bosmaganini aytib oʻtgan.

“Tepki bosilmagan edi. Men tepkini bosganim yoʻq... Hech qachon qurolni kimdir yoki nimagadir tirab, tepkini bosmagan boʻlardim. Hech qachon”, dedi aktyor.

Bolduinning aytishicha, pistoletda haqiqiy oʻq boʻlishi mumkinligini taxmin ham qilmagan, bu hodisa qanday sodir boʻlganini mutlaqo tushunmagan. “Kimdir qurolga haqiqiy patron solib qoʻygan... Ushbu patron suratga olish maydonchasida boʻlishi ham kerak emasdi”, dedi aktyor.

Alek Bolduin bu hayotida sodir boʻlgan eng yomon hodisa ekanligini taʼkidlagan.

Eslatib oʻtamiz, aktyor Alek Bolduin “Zang” filmining suratga olish maydonchasida operator Galina Xatchinsni tasodifan otib qoʻygan, buning oqibatida operator halok boʻlgandi.

• Kino
• mashhurlar