Andijon viloyati Marhamat tumanidagi oshxonalarning birida yong‘in sodir bo‘ldi. Bu haqda FVV matbuot xizmati xabar berdi.

Ma’lum bo‘lishicha, 17-iyun kuni soat 06:52 da Andijon viloyati Marhamat tumani “O‘zbekiston” MFY, Ipak yo‘li ko‘chasida joylashgan “Beshbola” umumiy ovqatlanish oshxonasida yong‘in sodir bo‘layotgani to‘g‘risida viloyat FVBga xabar kelib tushgan.

Shunga ko‘ra 6 ta yong‘in-qutqaruv ekipaji soat 06:56 da voqea joyiga yetib borib, yong‘in soat 07:08 da qurshab olingan va soat 07:58 da bartaraf etilgan.

Yong‘in natijasida oshxona 3-qavatining taxminan 250 kvadrat metr maydonda tom, shift va ichki qismi yonib zararlangan. Hodisa oqibatida tan jarohati olgan va halok bo‘lganlar yo‘q.

Hozirda yong‘inning kelib chiqish sababi va moddiy zarar miqdori aniqlanmoqda.

• Andijon
• FVV
• yong‘in