Amerikalik aktrisa va BMTning Ezgu niyat elchisi – Anjelina Joli Ukraina safari taassurotlari bilan oʻrtoqlashdi. U safar tafsilotlari bayon etilgan postni oʻzining Instagram sahifasiga joylagan.

Ijodkor Lvovda boʻlgan vaqtida kichik yoshli qizaloq tomonidan topib olingan “oʻziga xos tosh”ni koʻrgani haqida yozdi.

“Uni kichik qizaloq topib olgan va oddiy toshni emas, bombaning bir boʻlagini oʻynayotganini tushunib yetmagan. U notekis va tasavvur qilish imkonsiz boʻlgan darajada ogʻir edi. “Tosh”ning yaltirashi va noodatiy koʻrinishi bolaning eʼtiborini oʻziga tortgan”, deb yozadi Joli.

Aktrisa bomba portlashidan keyin uning parchalari odamlarning tanasiga borib sanchilayotganini aytib, jamoatchilikni ushbu bemaʼni urushni tugatishga chaqirgan.

“Bugun Ukrainada boʻlayotgan urushni toʻxtatish uchun kurash – qurbonlar, jarohat olganlar, oʻz uylarini tark etganlar va jabr koʻrganlar sonini kamaytirishga urinish maqsadida boshlangan kundalik poygaga oʻxshaydi”, deb yozdi Joli.

Eslatib oʻtamiz, aktrisa bundan bir necha kun avval BMTning maxsus elchisi sifatida Ukrainaning Lvov shahriga tashrif buyurgan va mahalliy odamlarni qoʻllab-quvvatlagan edi.

• Kino
• Shou-biznes
• gollivud
• mashhurlar