AQSh Davlat kotibi Entoni Blinken Ukraina tashqi ishlar vaziri Dmitriy Kuleba bilan telefon suhbatida Vashington Kiyevning hududlari ustidan nazoratni tiklashga qaratilgan harakatlariga yordam berishga tayyor ekanini ma’lum qildi. Suhbat stenogrammasi Qo‘shma Shtatlar Davlat departamenti saytida chop etilgan.

“Davlat kotibi Prezident Jo Baydenning Qo‘shma Shtatlar Ukrainaning xalqaro miqyosda tan olingan chegaralarini har doim hurmat qilishini va biz Ukrainaning pozisiyasini harbiy va diplomatik jihatdan mustahkamlash orqali o‘z hududlari ustidan nazoratni tiklash borasidagi sa’y-harakatlarini qo‘llab-quvvatlashda davom etishi haqidagi xabarini yana bir bor tasdiqladi”, – deyiladi xabarda.

Bundan tashqari, ta’kidlanganidek, Blinken Kuleba bilan Amerikaning Kiyevga harbiy yordami, jumladan Vashington tomonidan ajratilgan 1,1 milliard dollar miqdoridagi so‘nggi transhni ham muhokama qilgan.

“Davlat kotibi va tashqi ishlar vaziri, Ukraina donining eksporti butun dunyodagi eng muhtoj odamlarning ehtiyojlarini qondirishda davom etishini ta’minlash bo‘yicha sa’y-harakatlarni muhokama qildi, shuningdek, Ukraina yadroviy ob’ektlari xavfsizligini ta’minlash masalalariga to‘xtalib o‘tildi”, – deyiladi AQSh Davlat departamenti xabarida.

Qayd etish mumkin, 23-27-sentabr kunlari Donetsk va Lugansk xalq respublikalari, Xerson va Zaporojye viloyatining ozod qilingan hududlarida Rossiya tarkibiga qo‘shilish bo‘yicha referendumlar o‘tkazildi. 30-sentabr kuni Vladimir Putin Rossiyaga yangi hududlarni qabul qilish to‘g‘risidagi shartnomalarni imzoladi.

• AQSh
• Bayden
• Putin
• Rossiya
• Ukraina
• Zelenskiy