Amerika Qo‘shma Shtatlari so‘nggi kunlarda yevropalik ittifoqchilar va Volodimir Zelenskiy atrofidagilar bilan intensiv aloqada bo‘lib, ularni Polshadagi raketa hodisasini izohlashda ehtiyotkor bo‘lishga undadi. Bu haqda “Politico” gazetasi Amerika va Yevropadagi anonim manbalariga tayanib xabar bergan.

Nashrning yozishicha, so‘nggi ikki kun ichida telefon orqali suhbatlar chog‘ida AQSH hukumatining yuqori martabali mulozimlari ham o‘zlarining NATO bo‘yicha ittifoqchilaridan voqea yuzasidan rasmiy tergov yakunlanmaguncha “qat’iy bayonotlar berishdan tiyilish”ni talab qilgan.

Gazeta voqea bo‘yicha turli nuqtayi nazarlar rasmiy Vashington va Kiyev ritorikasida kuzatilayotgan birinchi jiddiy tafovutlardan biri ekanini qayd etgan. Ma’lum bo‘lishicha, AQSH hukumati doiralari yevropaliklar sodir bo‘layotgan voqealarning ahamiyatini yetarlicha baholamaydi, deb hisoblaydi.

Davlat departamentining Yevropa masalalari bo‘yicha ixtisoslashgan sobiq rasmiysi Xezer Konli bu borada ta’kidlaganidek, Polshaga raketa qulashi Qo‘shma Shtatlar, uning NATOdagi ittifoqchilari va Ukraina uchun haqiqatan ham “muhim sinov” bo‘lgan.

Eslatib o‘tish mumkin, joriy yilning 15-noyabr kuni kechqurun Polsha hududida, Ukraina bilan chegaraga yaqin joyda raketalar qulashi oqibatida ikki kishi halok bo‘ldi. Dastlab rasmiy Varshava gap Rossiya raketalari haqida ketayotganini aytib, NATO kengashini chaqirishni talab qildi. Biroq Polsha prezidenti Anjey Duda raketalar katta ehtimol bilan Ukrainaga tegishli ekanini qayd etdi.

AQSH prezidenti Jo Bayden G7 yetakchilarining favqulodda yig‘ilishi yakunida, dastlabki ma’lumotlar Rossiya qo‘shinlari qulagan raketani urganini tasdiqlamasligini aytdi. Pentagonning ma’lum qilishicha, ular taxminlar bilan emas, balki aniqlik kiritish uchun yetarli imkoniyatlar mavjud faktlar bilan ishlash niyatida.

Rossiya Mudofaa vazirligi harbiylar Ukraina-Polmsha chegarasi yaqinida hech qanday nishonga zarba bermagani, Varshavaning Moskva ishtiroki haqidagi barcha bayonotlari provokasiya ekanligini ta’kidladi. Vazirlik shuningdek, ekspertlar xulosasiga ko‘ra, voqea joyidan e’lon qilingan fotosuratlarda S-300 kompleksi uchun Ukraina raketasi parchalari ko‘rsatilganini ta’kidladi.

• AQSh
• Polsha
• Raketa
• Rossiya
• Ukraina
• Yevropa