Braziliyalik futbolchining agentlari unga Premyer-ligadan klub topish uchun hamma narsani qilishmoqda, ammo futbolchining yuqori maoshi oʻtishga jiddiy toʻsiq boʻlmoqda. Yarimhimoyachi “Barselona”da yiliga 14 million yevrodan koʻproq maosh oladi.

Filippe “Barselona” bosh murabbiyi Xavining rejalarida nimalar yoʻqligini biladi. Mavsumning ikkinchi qismida koʻp oʻyin amaliyoti olmasligini tushungan futbolchi 2022-yilda jahon chempionati boʻlishini inobatga olib, klubini oʻzgartirmoqchi.

Muhimi, Koutinyo Kataloniya klubini tark etishga tayyor, agar u yangi jamoada hozirgilari bilan taqqoslanadigan moliyaviy sharoitlarga ega boʻlsa.

Diario Sport xabariga koʻra, Koutinyoning maqsadi — Premyer-ligaga qaytish. Futbolchining agentlari koʻplab klublar bilan muzokaralar olib borishmoqda, ammo Filippe “Nyukasl”ga oʻtish borasidagi taklifni eshitishni istamayapti.

Braziliyalik futbolchiga “Everton”, “Arsenal” va “Tottenhem” klublari qiziqish bildirmoqda. Oʻz navbatida, “Liverpul” yarimhimoyachining qaytishiga qiziqmayapti.

Qayd etilishicha, “Everton” faqatgina Koutinyoni ijaraga olishga tayyor. Chunki klubda braziliyalikka toʻlanadigan yuqori maosh uchun mablagʻ yoʻq.

“Barselona” kelasi hafta voqealar rivojining yakunlanishiga umid qilmoqda. Agar Filippe klubini oʻzgartirsa, “koʻk-anorranglilar” yana bir top transferni amalga oshirishi mumkin boʻladi.

Maʼlumot uchun, 29 yoshli hujumkor yarimhimoyachi joriy mavsumda “Barselona” safida 16 ta oʻyinda maydonga tushdi va 2 ta gol urdi.

• Futbol
• Xorij