AQShning yigirmadan ortiq shtatlarida millionlab odamlar anomal issiqlikdan aziyat chekishmoqda.

AQSh prezidenti Jo Bayden ekstremal ob-havo va tabiiy ofatlarga bardosh bera oladigan infratuzilma barpo etish uchun 2,3 milliard dollar sarflashini eʼlon qildi. Ayni vaqtda AQShning yigirmadan ortiq shtatlarida millionlab odamlar issiqlikdan aziyat chekishmoqda.

Prezident iqlim oʻzgarishini dunyo uchun eng katta tahdidlardan biri deb taʼriflagan.

Mamlakat tomonidan ajratilgan mablagʻ toshqinga qarshi kurash choralarini kengaytirish, kommunal xizmatlarni kuchaytirish, binolarni qayta jihozlash va oilalarga isitish hamda sovitish xarajatlarini toʻlashga yordam berish uchun sarflanadi.

Oq uyning taʼkidlashicha, pul Favqulodda vaziyatlarni boshqarish federal agentligining byudjetidan kelib tushadi va birinchi navbatda nochor qatlam uchun ajratiladi.

“Farzandlarimiz bizdan umidvor. Agar biz iqlim oʻzgarishini 1,5 gradusdan past darajada ushlab turmasak, barcha narsani yoʻqotamiz”, – dedi AQSh Prezidenti.

• AQSh
• Bayden
• Moddiy yordam
• Ob-havo