AQSH va Xitoy rahbarlari 14-noyabr kuni Indoneziyaning Bali orolida bo‘lib o‘tadigan G20 sammiti doirasida uchrashadi.
AQSH prezidenti Jo Bayden va Xitoy rahbari Si Szinpin Bali orolida katta yigirmalik mamlakatlar rahbarlari sammiti doirasida ikki tomonlama uchrashuv o‘tkazadi. Bu haqda kecha, 10-noyabr kuni Oq uy matbuot kotibi Karin Jan-Per maʼlum qildi.
“Prezident Bayden 2022-yil 14-noyabr kuni Indoneziyaning Bali shahrida Xitoy Xalq Respublikasi Raisi Si Szinpin bilan uchrashadi. Rahbarlar ikki mamlakat o‘rtasidagi aloqa liniyalarini saqlab qolish va kengaytirish, Vashington va Pekin o‘rtasidagi raqobatni masʼuliyat bilan boshqarish, manfaatlar bir-biriga mos keladigan sohalarda, ayniqsa, jahon hamjamiyatiga taʼsir ko‘rsatadigan transmilliy muammolarda hamkorlik qilish borasidagi saʼy-harakatlar, bir qator mintaqaviy hamda global muammolarni ham muhokama qiladilar”, – deyiladi u eʼlon qilgan yozma bayonotda.
Ayni paytda, Xitoy Tashqi ishlar vazirligi matbuot kotibi Chjao Litszian 10-noyabr kuni bo‘lib o‘tgan brifingda aytganidek, TIV rasmiylari Si Szinpinning Balidagi G20 sammitida ishtirok etishini hali tasdiqlay olmaydi. Shu bilan birga, Chjao Litszian Xitoy AQShning Balida ikki davlat rahbarlarining uchrashuvini o‘tkazish haqidagi taklifiga katta ahamiyat berayotgani, hozirda tomonlar bu borada muzokaralar olib borayotganini taʼkidlagan.
Qayd etish mumkin, avvalroq Rossiya prezidenti Vladimir Putin sammitda ishtirok etmasligi haqida xabar berilgan edi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!