O‘zbekiston Respublikasi mustaqillik bayramining 31 yilligi munosabati bilan pensiya to‘lovlari oldindan yuklab beriladi. Bu haqda Moliya vazirligi huzuridagi budjetdan tashqari Pensiya jamg‘armasi matbuot xizmati xabar berdi.

Qayd etilishicha, keksa yoshdagi fuqarolarni, pensiya va nafaqa oluvchilarni hamda nogironligi bo‘lgan shaxslarni qo‘llab-quvvatlash va Mustaqillik bayramini ko‘tarinki ruhda o‘tkazish maqsadida Moliya vazirligi huzuridagi budjetdan tashqari Pensiya jamg‘armasi tomonidan joriy yilning sentyabr oyi uchun pensiya va nafaqa to‘lov qaydnomalarini avgust oyida shakllantiradi hamda pensiya va nafaqa to‘lovlarini boshlash uchun yetarli mablag‘larni 2022-yil 1-sentyabrga qadar tijorat banklariga moliyalashtirib beradi.

Pensiya va nafaqa to‘lovlarini naqd pulsiz (bank karta) shaklda oluvchi fuqarolarning joriy yil sentyabr oyi uchun pensiya va nafaqalari 2022-yil 1-sentyabrga qadar ularning bank plastik kartalariga yuklab beriladi.

Pensiya va nafaqa to‘lovlarini naqd shaklda oluvchi fuqarolarga joriy yilning 5-sentyabrdan boshlab tasdiqlangan grafiklar asosida to‘lovlar boshlanadi.

Ma’lumot uchun, O‘zbekiston Respublikasi Prezidentining 2021-yil 20-dekabrdagi PF-35-son Farmoni bilan O‘zbekiston Respublikasi davlat Mustaqilligining 31 yilligini munosib nishonlash maqsadida joriy yilning 1-4-sentyabr kunlari dam olish kuni deb belgilangan.

• Mustaqillik
• pensiya