Bosh prokuraturaning Qoraqalpog‘istonda sodir bo‘lgan voqealar ortidan o‘tkazilayotgan tezkor-tergov natijalari bo‘yicha bergan bayonotiga ko‘ra, qoraqalpog‘istonlik jurnalist va bloger Dauletmurat Tajimuratov o‘zining Telegram’dagi kanali orqali videomurojaat yo‘llagan. Unda fuqarolarni “Qoraqalpog‘iston Respublikasining ozodligini so‘rab” namoyish o‘tkazishga da’vat qilgan.
Qayd etilishicha, joriy yilning 1-iyul kuni soat 14:50 larda “El xizmetinde” gazetasi muharriri va bloger Dauletmurat Tajimuratov Telegram ijtimoiy tarmog‘ining “Makan.uz” kanali orqali videomurojaat yo‘llagan. Videomurojaatida fuqarolarni shu kuni soat 17:00 da “Qoraqalpog‘iston Respublikasining ozodligini so‘rab” Jo‘qorg‘i Kenges binosi oldida miting o‘tkazishga da’vat qilgan.
Shundan keyin ijtimoiy tarmoqlar orqali fuqarolarni qonunga xilof ravishda miting uyushtirishga da’vat qilganligi uchun joriy yilning 1-iyul kuni soat 15:30 larda Dauletmurat Tajimuratov ushlangan va Nukus shahar IIO FMBga olib kelingan.
“Bloger Dauletmurat Tajimuratovning IIB xodimlari tomonidan ushlaganini bilgan bir guruh shaxslar tartibsizliklar uyushtirib, uni ozod qilishni talab qilib Nukus shahridagi IIVga qarashli 2-sonli tergov hibsxonasiga va Nukus shahar IIO FMBga borishgan, keyinchalik joriy yilning 1-iyul kuni soat 17:30 larda Nukus shahri markazidagi “Markaziy dehqon bozori” MCHJ oldidagi avtomobil yo‘lida tartibsizliklar uyushtirishgan.
Shundan so‘ng, Dauletmurat Tajimuratov Nukus shahar IIO va FMBdan ozod qilinib, chiqarib yuborilgan bo‘lsa-da, Dauletmurat Tajimuratov va uning tarafdorlari tartibsizliklarni yana davom ettirib, huquqni muhofaza qiluvchi idoralar xodimlariga faol qarshilik ko‘rsatib, O‘zbekiston Respublikasining amaldagi davlat tuzumini Konstitutsiyaga xilof tarzda o‘zgartirishga va hokimiyatni bosib olishga ochiqdan-ochiq da’vat qilishgan.
Joriy yilning 2-iyul kuni soat 14:45 da Nukus tumanidan taxminan 300 nafar shaxs Nukus shahar tomon harakatlanib, huquqni muhofaza qiluvchi idoralar xodimlarining qonuniy talablariga bo‘ysunmasdan, Nukus shahridagi blok postda xizmat olib borayotgan 50 nafar Milliy Gvardiya xodimining maxsus vositalarini (ratsiya, dubinka, kaska, shumovaya granata, it) qo‘lga kiritgan”,– deyiladi Bosh prokuratura bayonotida.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!