Avval xabar berilganidek, kecha, 9-yanvar kuni Toshkent viloyati Boʻstonliq tumanidagi Chimyon togʻida dengiz sathidan 2 200 metr balandlikda qor polosi boʻyicha 2-anʼanaviy “SNOW POLO AMIRSOY CUP-2022” musobaqasi tashkil etildi.

Unda jami 4 ta jamoa “Milliy gvardiya Polo Club”, “OFB Polo Club” (Orient Finans bank), “Ot sporti maktabi” hamda “NRG Polo Club” jamoalari ishtirok etishdi.

Musobaqa Nizomiga koʻra, dastlab jamoalar yarim finalda oʻzaro kuch sinashishdi. Qurʼa natijasiga koʻra, yarim finalning dastlabki oʻyinida “OFB” jamoasi Milliy gvardiya qoshidagi ot sporti boʻyicha Respublika oliy sport mahorati maktabi xodimlaridan tashkil topgan jamoasini yaqqol ustunlik bilan 8:1 hisobida magʻlub etdi.

Ikkinchi yarim final juftligida “NRG Polo Club” jamoasi aʼzolari musobaqada gʻoliblikka asosiy daʼvogar “Milliy Gvardiya” polo jamoasiga kichik 2:1 hisobida imkoniyatni boy berishdi.

Hal qiluvchi final bahsida esa milliy gvardiyachilar “OFB Polo Club” ustidan 3:1 hisobida ishonchli gʻalabaga erishdi va “Snow Polo Amirsoy Cup-2022” musobaqasi gʻolibiga aylandi.

Darvoqe, bu “Milliy Gvardiya” polochilarining ushbu yoʻnalishdagi musobaqalarda qoʻlga kiritgan ilk tituli sifatida tarixga kirdi.

• O‘zbekiston
• Sport