Kecha, 8-yanvar kuni Braziliyaning sobiq prezidenti Jair Bolsonaro tarafdorlari polisiya bilan to‘qnashib, Braziliyadagi hukumat binolariga bostirib kirishdi. Ular parlament binosi, Federal Oliy sud va davlat rahbarining ishchi qarorgohini vayron qilgan.
Halok bo‘lganlar va jarohatlanganlar haqida hozircha ma’lumotlar yo‘q.
Ko‘plab xalqaro siyosiy arboblar namoyishchilarning harakatlarini qoralab, Luiz Inasio Lula da Silva va uning hukumatini qo‘llab-quvvatlashlarini ma’lum qilgan.
Qayd etilishicha, Bolsonaro tarafdorlari oktyabrdagi prezidentlik saylovlari natijalariga qarshi chiqdi. Braziliya bayroqlari va sariq-yashil libos kiygan namoyishchilar parlament, Federal Oliy sud binolari va davlat rahbarining ishchi qarorgohi hisoblangan Planalto saroyining oynalarini sindirgan. Dam olish kunlarida bo‘sh turgan ma’muriy binolar qo‘riqchilari qoidabuzarlarga qarshi tura olmagan.
Braziliya poytaxti federal okrugidan kelgan harbiy polisiya vertolyoti namoyishchilarga qarata ko‘zdan yosh oqizuvchi gazli granatalarni uloqtirgan.
Tartibsizliklar boshlanganidan bir necha soat o‘tgach, Braziliyadagi polisiya bo‘linmalari namoyishchilarni o‘zlari egallab olgan hukumat binolaridan chiqarib yuborishga muvaffaq bo‘ldi. Dastlab 30 nafar namoyishchi hibsga olingani haqida xabar berilgan edi. Keyinroq Globo telekanali tartibsizliklarda qatnashgan 150 nafar mahbus haqidagi ma’lumotlarni e’lon qildi.
Braziliya rasmiylarining munosabati
Lula da Silva tarafdorlari bosh prokurordan Braziliyada federal xavfsizlik kuchlaridan foydalanishga ruxsat berishni so‘radi.
Braziliya prezidenti mamlakat poytaxtida yakshanba kungi tartibsizliklarda ishtirok etgan fuqarolarni aniqlash va ularni jazolashga va’da berdi. U tartibsizliklar munosabati bilan vazirlar ishtirokida favqulodda yig‘ilish o‘tkazgan.
Yanvar oyi oxirigacha Braziliyada favqulodda holat joriy qilingan
Braziliya bosh prokuraturasi hukumat manfaatlarini himoya qilib, poytaxt jamoat xavfsizligi boshqarmasi sobiq rahbari Anderson Torresni hibsga olishni talab qildi.
Braziliya bosh prokurori Augusto Aras poytaxt federal okrugi prokuraturasidan Braziliyadagi tartibsizliklar yuzasidan jinoiy ish qo‘zg‘atishni so‘ragan.
Xalqaro hamjamiyatning munosabati
Yevropa Kengashi rahbari Sharl Mishel va Yevropa Ittifoqi tashqi siyosat bo‘yicha mas’ul Xosep Borrel Yevropa Ittifoqi Braziliyada namoyishchilarning parlament va hukumat binolarini egallab olishini qoralashi va mamlakatning qonuniy ravishda saylangan prezidenti Luiz Inasio Lula da Silvani to‘liq qo‘llab-quvvatlashini bildirgani..
Argentina prezidenti Alberto Fernandes xalqaro hamjamiyatni Braziliyadagi tartibsizliklarni qoralashga chaqirgan.
Britaniya tashqi ishlar vaziri Jeyms Kleverlining aytishicha, uning mamlakati Braziliyadagi hukumatga qarshi namoyishlar fonida Lula da Silvani to‘liq qo‘llab-quvvatlaydi.
AQSH prezidenti Jo Bayden Braziliyadagi vaziyatni dahshatli, deb atadi. AQSH Davlat kotibi Entoni Blinken esa namoyishlarni zudlik bilan to‘xtatishga chaqirdi.
Chili rahbari Gabriel Borich Braziliyaning sobiq prezidenti Jair Bolsonaro tarafdorlari uyushtirgan tartibsizliklarni qoralab, buni “demokratiyaga qarshi qo‘rqoqlarcha hujum” sifatida baholadi.
Venesuela prezidenti Nikolas Maduro sobiq prezident Jair Bolsonaro tarafdorlarini neofashistlarga qiyosladi.
Tashqi ishlar va xalqaro hamkorlik vaziri, Italiya bosh vazir o‘rinbosari Antonio Tajani Braziliyadagi prezidentlik saylovi natijalari hurmat qilinishi kerakligini aytdi.
Fransiya yetakchisi Emmanuel Makron poytaxtdagi tartibsizliklar munosabati bilan Lula da Silvani qo‘llab-quvvatlashini bildirdi.
Meksika tashqi ishlar vaziri va Kuba prezidenti Migel Dias-Kanel ham tartibsizliklarni qoralagan.
Ekvador rahbari Gilyermo Lasso namoyishlarni demokratiyaga hurmatsizlik, deb atadi.
Kolumbiya prezidenti Gustavo Petro Braziliyadagi voqealar munosabati bilan Amerika Davlatlari Tashkilotining (OAS) shoshilinch yig‘ilishini o‘tkazishga chaqirdi va buni fashizmning demokratiyaga zarbasi sifatida baholadi. OAS bosh kotibi Luis Almagro Bolsonaro tarafdorlarining davlat muassasalariga hujumlarini “fashistik” ruh bilan yo‘g‘rilganini ta’kidladi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!