Avvalroq, rossiyalik sayohatchi bloger Maksim Limar shaxsiy buyumlari orasidan kvadrokopter topilgani tufayli Oʻzbekistonda qoʻlga olingani haqida xabar berilgan edi.

Qayd etilishicha, Limar uchuvchisiz uchish apparatlarlarini Oʻzbekiston hududiga olib kirish va ulardan foydalanish qoidalarini notoʻgʻri talqin qilgan.

Sayohatchi Oʻzbekiston qonunchiligida kvadrokopterlarning 250 grammdan ortigʻi majburiy roʻyxatga olinishi shartligi, biroq uning texnikasi atigi 249 gr. ekanini aytgan (bu ishlab chiqaruvchi tomonidan dronning oʻzida chop etilgan xususiyatlar bilan tasdiqlanadi). 

Fuqaro aviatsiyasi agentligining maʼlum qilishicha, uchuvchisiz uchish apparati ogʻirligi 250 grammdan oshmagan holda, foto va video uskunalar bilan jihozlangan boʻlsa, ushbu qurilma Oʻzbekistonga olib kirish hamda undan foydalanish uchun ruxsat talab etilmaydigan uchuvchisiz uchish apparatlari qatoridan chiqariladi. 

Vazirlar Mahkamasining 287-son qarori bilan tasdiqlanganNizomga asosan, oʻyinchoq model deganda, avtonom parvozni boshqarish va navigatsiya funksiyasiga ega boʻlmagan, foto va video jihozlar bilan jihozlanmagan, vazni 250 grammdan oshmaydigan uchuvchisiz uchish apparati tushuniladi.

Qayd etilishicha, chet ellik sayyohlar va xorijiy OAV vakillari tomonidan talab ortib borayotgani hamda turizmni rivojlantirish uchun Oʻzbekiston Respublikasining sayyohlik salohiyati toʻgʻrisidagi foto va videomateriallarni tayyorlash maqsadida uchuvchisiz uchish qurilmalarini Oʻzbekiston Respublikasi hududiga vaqtinchalik olib kirish va ulardan foydalanishga ruxsat berishning soddalashtirilgan tartibi ishlab chiqilgan. 

Eslatib oʻtish mumkin, Maksim Limar dronning ogʻirligi va oʻlchamiga oid xususiyatlarga aniqlik kiritish jarayoni yakunlanguniga qadar uy qamogʻida saqlanadi. Rossiyaning Oʻzbekistondagi elchixonasi vaziyatni tezroq hal etish maqsadida bloger Maksim Limar va Oʻzbekiston Respublikasining huquq-tartibot idoralari bilan doimiy aloqada boʻlib turganini maʼlum qilgan. 

• Bloger
• Buxoro
• Rossiya
• dron