Maʼlum qilinishicha, Gʻijduvon tumani, “Zarangari” MFY, Kalon qishlogʻida yashovchi 46 yoshli Zarif Roʻziyev (ism-familiyasi oʻzgartirilgan) voqeadan bir kun ilgari ukasining tugʻilgan kuniga bora olmagani uchun tong sahardanoq uning xonadonida boʻlgan va spirtli ichimlik isteʼmol qilgan.

Ukasining uyidan oʻz uyiga mast holatda qaytgan va turmush oʻrtogʻi Vazira Roʻziyeva (ismi familiyasi oʻzgartirilgan) bilan oʻzaro kelishmovchilik sababli janjallashib qolgan.

Oqibatda ayblanuvchi xotinining chap tomon koʻkragi yuqori qismidan bir marotaba tepadan-pastga yoʻnalishda zarb bilan urgan. Ayol yerga yiqilib, voqea joyida vafot etgan.

Jinoyat ishlari boʻyicha Vobkent tuman sudi hukmiga koʻra, ayblanuvchi Oʻzbekiston Respublikasi Jinoyat kodeksi 97-moddasining 1-qismida nazarda tutilgan jinoyatni sodir etganlikda aybli, deb topilgan va unga shu modda bilan 13 yil ozodlikdan mahrum qilish jazosi tayinlangan.

Qayd etilishicha, u 2002-yilda Jinoyat kodeksining 164-moddasi (bosqinchilik) 2-qismining “a” va “b” bandlari bilan 5 yil ozodlikdan mahrum qilingan, 2016-yilda esa Jinoyat kodeksining 270-moddasi (taqiqlangan ekinlarni yetishtirish) 1-qismi bilan 1 yilga axloq tuzatish ishlariga hukm qilingan.

• Buxoro
• Jinoyat
• Sud