Halq deputatlari Uchtepa tuman Kengashining deputati N.Zayniddinovning bildirishicha, Uchtepa tumani hokimi deputatlar rad etgan masalalarni “qabul qildi” mazmunida imzolagan.

Shuningdek, deputat mazkur sessiyadan videotasvirni ulashmoqda. Unda sessiyada deputatlar Uchtepa tumanidagi 109-maktab direktori lavozimiga taqdim etilgan nomzodni rad etishgani aks etgan.  Sessiyaga hokim emas, deputat S.Imamov raislik qilgan. Ammo hokim deputatlarni qarorini tan olmay, ular nomidan bir o‘zi maktab direktorligiga G.Imomaliyeva nomzodini tasdiqlash haqida qaror qabul qilgan.

Shuningdek, deputatlar tuman hokimiyatiga ustama belgilash va mebel olish bo‘yicha qarorlarini ham rad etishgan. Biroq hokim bu vaziyatda ham qarorni o‘zi qabul qilib, o‘zi imzolagan.

“Sessiya o‘tishi jarayonlari Uchtepa tumani hokimiligi matbuot xizmatining feysbookdagi sahifasida to‘g‘ridan to‘g‘ri efirga uzatib borilgan.

Shunga qaramasdan tuman hokimi sessiya qarorlarini chiqartirib, elektron raqamli imzo bilan imzolab, Adliya vazirligining mahalliy davlat hokimiyati organlari tomonidan qabul qilinadigan qarorlarni ishlab chiqish, kelishish va ro‘yxatdan o‘tkazishning yagona elektron tizimi – “e-qaror.gov.uz” saytiga yuklagan”, – deydi deputat.

U, shuningdek, tuman hokimini Kengash Reglamenti talabalarini va qonunchilik normalarini buzganlikda ayblaydi.

“Shu o‘rinda haqli savol tug‘iladi? Xalq vakillarini fikri ya’ni xalq ovozi bilan Uchtepa tumani hokimi hisoblashmaydimi? Yoki deputatlarni qonun bilan belgilangan faoliyati kafolatlarini bila turib, qo‘pol ravishda buzmoqdami?

Sessiyaga raislik qiluvchi S.Imamov imzolamagan 49 sessiya qarorlari qanchalik qonuniy?” – deb savol qo‘yadi deputat.

• Deputat
• Toshkent
• sessiya