54 yoshli yaponiyalik sobiq hujumchi Kazuyoshi Miura 2022-yilda Yaponiyaning toʻrtinchi ligasida toʻp tepadi. U “Yokogama”dan “Suzuka Point Getters”ga koʻchib oʻtdi.

Oʻtgan yili “Yokogama” ikkinchi ligaga tushib ketgan edi. Miura bir mavsumda bor yoʻgʻi toʻrtta oʻyin oʻtkazdi. Xabar qilinishicha, klub futbolchiga yangi shartnoma taklif qilgan, biroq u koʻproq oʻyin vaqtini olishni istayotgani uchun rad javobini bergan.

“Suzuku”ga Kazuyoshining 56 yoshli akasi Yasutoshi Miura murabbiylik qiladi.

Qayd etilishicha, bu Kazuyoshi Miuraning professional futboldagi 37-mavsumi boʻladi, “Suzuka” esa u toʻp tepgan 15 klubga aylanadi.

Miura oʻz faoliyatini 1986-yilda Braziliyaning “Santos” klubida boshlagan. Mamlakatning boshqa klublarida bir necha mavsum oʻtkazgandan soʻng, Yaponiyaga qaytgan futbolchi u yerda qatorasiga toʻrt yil mamlakat chempioni boʻldi. Miura keyinchalik “Jenoa”, “Dinamo Zagreb” va boshqa klublarda faoliyat yuritdi.

2017-yil 6-mart kuni oʻsha paytda 50 yoshu 7 kunlik boʻlgan Miura Yaponiya chempionati ikkinchi divizioni “V-Varen Nagasaki” klubi bilan oʻyinda afsonaviy ingliz futbolchisi Stenli Metyusning rekordini ortda qoldirib, professional futbol tarixidagi eng keksa faol futbolchiga aylandi.

Keyinchalik esa, shundan 6 kun oʻtib, Miura professional futbolchi sifatida gol urgan tarixdagi eng keksa futbolchi boʻldi.

• Futbol
• Xorij
• qiziqarli