Ertaga, 15-iyul kuni Toshkent shahrida Oʻzbekiston Respublikasi raisligida Shanxay hamkorlik tashkilotiga (SHHT) aʼzo davlatlar sanoat vazirlari yigʻilishi hamda Mustaqil Davlatlar Hamdoʻstligiga (MDH) aʼzo davlatlarning Sanoat siyosati boʻyicha Kengashining VIII yigʻilishi boʻlib oʻtadi.

Tadbirlarda Hindiston, Pokiston, Qirgʻiziston, Tojikiston sanoat vazirlari, Belarus, Rossiya, Qozogʻiston, Xitoy tarmoq vazirlarining oʻrinbosarlari, SHHT Bosh kotibi Chjan Min, MDH Ijroiya qoʻmitasi raisining oʻrinbosari Ilhomjon Nematov, shuningdek, Rossiya va Qozogʻiston ishbilarmon doiralari vakillari ishtirok etadi.

Yigʻilish ishtirokchilari ushbu SHHT va MDH doirasida sanoatni rivojlantirish, kooperatsiya asosida sanoat ishlab chiqarish hajmining barqaror oʻsishini taʼminlash, qoʻshma investitsiya loyihalarini amalga oshirish, yangi texnologiyalarni joriy etish, moddiy va moliyaviy resurslarni jalb qilish, mehnat unumdorligini oshirish va sanoat mahsulotlarini diversifikatsiya qilish boʻyicha hamkorlikni yanada jadallashtirish va kengaytirish masalalarini muhokama qiladilar.

Uchrashuvlar chogʻida SHHT va MDH ga aʼzo davlatlar sanoatini rivojlantirishga qaratilgan qator muhim hujjatlar tasdiqlanishi kutilmoqda.

Xususan, Shanxay tashkilotiga aʼzo davlatlar vazirlari SHHT mamlakatlari ishbilarmon doiralari oʻrtasida sanoat kooperatsiyasini ragʻbatlantirish dasturi loyihasini maʼqullaydilar. Mazkur hujjat Tashkilotning Samarqand sammiti kun tartibiga tasdiqlash uchun kiritiladi.

MDHga aʼzo davlatlar sanoat vazirlari yigʻilishida ham ushbu yoʻnalishdagi hamkorlikka doir hujjat tasdiqlanishi kutilmoqda.

• MDH
• ShHT