Prezident Shavkat Mirziyoyev Islom sivilizatsiyasi markazi qurilishi bilan tanishgach, Olmazor tumanidagi “Universitet” mahallasida bo‘ldi. So‘ng 102-sonli eshitishi zaif bolalar uchun maktab-internatda muassasa tarbiyalanuvchilari va pedagoglari bilan suhbatlashdi.
Ayni paytda ushbu muassasada videoselektor yig‘ilishi bo‘lib o‘tmoqda.
Ma’lum qilinishicha, Xalq ta’limi vazirligiga “Zamin” fondi bilan hamkorlikda joriy yil 2 600 dan ziyod zaif eshituvchi bolalarni tibbiy tekshiruvdan o‘tkazib, ularni eshitish moslamalari bilan ta’minlash choralarini ko‘rish, eshitish moslamalari va koxlear implantasiya yordamida eshitish qobiliyati tiklangan bolalarni bosqichma-bosqich umumta’lim maktablariga o‘tkazish va maktab-internatlarni optimizasiya qilish vazifasi topshirilgan.
Mutaxassislar fikriga ko‘ra, agar barcha yangi tug‘ilgan chaqaloqlarning eshitish qobiliyati skrining qilinsa, vaqtida zarur choralarni ko‘rish orqali eshitish nogironligini 60 foizga kamaytirish mumkinligi ta’kidlangan.
Shuningdek, 2022 yilda imkoniyati cheklangan bolalar va kattalarni zarur jihozlar bilan ta’minlash maqsadida Tibbiy-ijtimoiy xizmatlar agentligiga 31 milliard so‘m mablag‘ ajratiladigan bo‘ldi.
Bunda, bolalar syerebral falaji, umurtqa pog‘onasi kasal bo‘lgan shaxslarda mustaqil yurish funksiyalarini qayta tiklash uchun 20 dona ekzoskelet, 880 nafar nogironligi bo‘lgan shaxslarga zamonaviy pultli aravachalar, ko‘zi ojiz bolalar va kattalar uchun 1 ming 800 dona ovozli termometr, 2 ming dona ovozli tonometr, 2 ming dona Brayl alifbosi bo‘yicha yozuv moslamalari, nogironligi bo‘lgan shaxslar favqulodda vaziyatlarga tushganda ularga tezkor yordam ko‘rsatish uchun 6 mingta smart-soat, shuningdek yetarli miqdorda eshitish moslamalari xarid qilish nazarda tutilgan.
Qayd etilishicha, tibbiy-ijtimoiy muassasalar kontingentini to‘liq tibbiy ko‘rikdan o‘tkazish, ularni manzilli davolash va dam olishga yo‘naltirish shartligi qat’iy belgilab qo‘yildi.
Sog‘liqni saqlash vazirligiga bir oy muddatda barcha tug‘ruqxonalarni eshitishni skrining tekshiruvi uskunalari bilan jihozlash va eshitish nogironligini kamaytirish bo‘yicha Hukumat qarori loyihasini kiritish va “Ijtimoiy xizmat” elektron platformasini joriy yil 1 mayga qadar ishga tushirishni ta’minlash vazifasi topshirilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!