Kecha, 13-oktyabr kuni Iroq parlamenti Abdullatif Rashidni mamlakatning yangi prezidenti etib sayladi. Bu haqda “Aljazeera” nashri berdi.

Qayd etishicha, ovoz berish majlisida 329 deputatdan 269 nafari ishtirok etgan. Rashid uchun 157 nafar deputat ovoz berdi, u raqibi, 99 ta ovoz to‘plagan Iroqning sobiq prezidenti Barham Solihni ortda qoldirdi.

Rashid 78 yoshda, u Saddam Husayn rejimining ashaddiy raqibihisovlanadi. U Iroq suv xo‘jaligi vaziri bo‘lib ishlagan, shuningdek, Kurdiston vatanparvarlik ittifoqi partiyasining vakili ham bo‘lgan. Arab, kurd va ingliz tillarini biladi.

Parlament yig‘ilishi boshlanishi arafasida mamlakatda raketa hujumlari sodir etilgan va unda tinch aholi vakillari hamda xavfsizlik kuchlari a’zolari yaralangan.

Joriy yil 7-fevraldan 30-martgacha mamlakatda yangi davlat rahbarini saylash uchun uchta muvaffaqiyatsiz urinishlar amalga oshirilgan.

Qayd etish mumkin, shia yetakchisi Muqtada as-Sadr o‘tgan yili parlamentdagi ovoz berishda g‘olib bo‘lgan, ammo hukumat tuzish uchun yetarlicha qo‘llab-quvvatlanmaganidan so‘ng mamlakat bir necha oylik siyosiy boshi berk ko‘chaga kirib qolgan va avgust oyida as-Sadr siyosatni tark etishini e’lon qilgan.

• Iroq
• Prezident