Jahon sog‘liqni saqlash tashkiloti (JSST) Bosh direktori Tedros Adhanom Gebreyesus tahdidli xabarlar ola boshladi. Bu haqda u “The Washington Post” gazetasiga bergan intervyusida ma’lum qildi.

Gebreyesusning so‘zlariga ko‘ra, u hayotga tahdid soladigan ko‘plab xabarlarni olmoqda.

 “Hayotimga tahdid solayotgan ko‘plab xabarlar bor. Ular menga to‘g‘ridan-to‘g‘ri SMS orqali tahdid qilishdi. Hujumchilar mening raqamimni qanday olishganini bilmayman”,– deydi u.

Shuningdek, JSST rahbari tahdidlar COVID-19 pandemiyasi bilan bog‘liq deb o‘ylashini aytgan. Uning taʼkidlashicha, koronavirus pandemiyasi tugadi deb aytishga hali erta.

Nashr tahdidlar aynan kimdan kelayotganiga aniqlik kiritmagan.

Hozirda Gebreyesusning uyida signalizatsiya o‘rnatilgan va qo‘l ostidagilar unga ko‘proq qo‘riqchilar yollashni taklif qilmoqda.

Avvalroq, JSST rahbari Tedros Adhanom  Gebreyesus COVID-19 pandemiyasi tez orada tugashi mumkinligini aytgandi. Shuningdek , dunyoda koronavirus tufayli rasman qayd etilgan o‘limlar soni 6,5 milliondan oshgani ma’lum bo‘ldi.

• Bosh kotib
• JSST