2010-yilda Kamboja hududidan tutilgan koʻrshapalaklar qoni va biologik suyuqliklari tarkibini oʻrganish natijasida SARS-CoV-2ga turdosh viruslar aniqlandi. Ularning pandemiyaga sabab boʻlgan virusga oʻxshashlik darajasi 92,6 foizni tashkil qiladi.

Fransiyaning Paster instituti olimlari koʻrshapalaklar va boshqa turdagi sutemizuvchilardan olingan 400 dan ortiq namunani tadqiq qilganlar. Natijada “Rhinolophus shameli” turiga mansub koʻrshapalaklar qonida RshSTT182 va RshSTT200 viruslari mavjud ekani aniqlangan.

Ushbu viruslar COVID-19 ni keltirib chiqargan SARS-CoV-2 ga oʻxshaydi, ammo uning SARS-CoV-2 dan asosiy farqi odam tanasidagi hujayralar ichiga kira olmasligidir. Tahlillar shuningdek, ushbu virus, uning ajdodlari va boshqa turdagi koronaviruslar oʻrtasida faol genetik almashinuv mavjudligini koʻrsatgan.

Olimlar bu turdagi koʻrshapalaklar hech qachon Xitoy hududida hayot kechirmaganini ham qayd etishgan. Bu esa SARS-CoV-2 infeksiyasining olimlar avval taxmin qilganlaridan koʻra koʻproq hududlarga tarqalganidan darak beradi.

• koronavirus
• tadqiqot