Gollivudning taniqli aktyori Kianu Rivz “Matritsa” franshizasining ilk filmi uchun olingan daromaddan 70 foizini leykemiya kasalligiga qarshi kurashish fondiga xayriya qildi. Aktyor franshizaning ilk filmida suratga tushgani evaziga 10 million AQSh dollari miqdorida haq olgan, keyinchalik kinoteatrlardagi namoyishdan tushgan daromadning 10 foizi – 35 million dollar miqdoridagi mablagʻni qoʻlga kiritgan. Umumiy hisobda 45 million dollarning 70 foizi leykemiyaga qarshi kurashish fondi hisob raqamiga oʻtkazib berilgan.
Gap shundaki, 1991-yilda aktyorning kichik singlisi Kim Rivzda leykemiya kasalligi aniqlangan. Ana shu vaqtlarda aktyor xasta singlisiga gʻamxoʻrlik qilishni oʻz boʻyniga olgan. Ijodkor singlisiga yaqinroq boʻlish uchun oʻz uyini sotib yuborgan, uning kasallikdan butunlay tuzalib ketishi uchun 5 million AQSh dollari miqdorida mablagʻ sarflagan.
“U har doim men uchun gʻamxoʻrlik qilardi. Men ham unga butun umr gʻamxoʻrlik qilaman”, degan edi Kianu oʻsha vaqtlarda.
2001-yilda Kim Rivzdagi kasallik remissiya davriga oʻtgan. Ayni vaqtda aktyorning singlisi 55 yoshda. Kianu Rivzning oʻzi esa 2000-yillar boshida saratonga qarshi kurashish fondini tashkil qilgan. Ammo, tashkilot nomini ochiqlamaslik qaroriga kelgan.
Maʼlum boʻlishicha, Kianu franshizaning qolgan ikkita filmidan olgan daromadini vizual effektlar bilan ishlagan guruh aʼzolari, shuningdek liboslar ustida ishlagan dizaynerlar bilan boʻlishgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!