“Titanik” halokati – XX asrning eng dahshatli va fojiali hodisalaridan biri. Ushbu halokat haqida juda koʻp filmlar suratga olingan, ular orasidagi eng mashhuri esa rejissyor Jeyms Kemeron tomonidan taqdim etilgan “Titanik” filmidir. Film bosh qahramonlar – Rouz va Jek oʻrtasidagi muhabbat haqida hikoya qilsa-da, kinoasar mualliflari unga haqiqatda ham tarixda boʻlgan va “Titanik”da safarga otlangan shaxslar obrazini qoʻshishni unutmaganlar.

Margaret Braun

Margaret Braun prototipi boʻlgan Molli Braun zodagon ayollardan biri, jamoatchilik arbobi va filantrop edi. U filmda Jekni oqsuyaklar davrasidagi kechki taomga taklif qiladi, bosh qahramonga oʻgʻlining liboslarini taqdim etadi. Aslida esa Molli Braun halokat sodir boʻlgandan keyin yoʻlovchilarni qayiqlarga oʻtkazishda jonbozlik koʻrsatgan, oʻzi esa qayiqqa chiqishdan bosh tortgan. U real hayotda ham qayiq boshqaruvchisini uni ortga burishga va yana bir nechta odamni qutqarishga koʻndirgan.

Molli Braun halokatdan keyin omon qolganlarga yordam berish bilan shugʻullangan, ularga bir-birlarini topishga koʻmak bergan. Margaret ushbu saʼy-harakatlari uchun mukofot bilan ham taqdirlangan.

Kapitan Edvard Smit

Edvard Smit “Uayt Star Layn” kompaniyasining eng tajribali kapitanlaridan biri edi. U “Titanik” kemasining rulini qoʻlga olishdan avval 40 yillik tajriba toʻplagan. Filmda kema kapitani qahramonlik koʻrsatgancha “Titanik”da qolishni va shu yerda oʻlishni afzal biladi.

Haqiqiy “Titanik”ning kapitani oʻz jamoasiga yoʻlovchilarni qutqarishga yordam bergan, kemaning boshqaruv ruli yoniga esa halokatga sanoqli daqiqalar qolganda va yoʻlovchilarni qutqarish imkoni butunlay boy berilgandagina kelgan.

Tomas Endryus

Tomas Endryus “Titanik”ning bosh muhandisi edi, shuning uchun kemaning ilk safarida oʻzi ham ishtirok etishni istagan. Kema aysbergga toʻqnashganidan keyin halokatdan qochib qutulish imkoni yoʻq ekanligini birinchi boʻlib tushungan odam ham Endryus edi.

Tomas Endryus yoʻlovchilarni kayutalarni zudlik bilan tark etish, qutqaruv nimchalarini kiyish va qayiqlarga tezroq chiqib oʻtirishga chaqirgan. Muhandis yoʻlovchilarni qutqarib qolish uchun oxirigacha kurashgan. Halokatdan omon qolgan insonlar u oxirgi marta kema palubasida koʻrinish bergani, muhandis pastga tushib ketgan odamlar tomon oʻrindiqlar uzatgani, choʻkayotgan odamlar oʻrindiqlardan qayiq oʻrnida foydalanishlariga umid qilganini aytishadi. Afsuski, Endryus halokatdan omon qolmagan.

Jozef Bryus Ismey

Jozef Bryus Ismey “Uayt Star Layn” kompaniyasi raisi va direktori edi. “Titanik” uning orzulari amalga oshgan moʻjizaga aylangan: Ismey kemaning imkon qadar hashamatli boʻlishi, raqobatchilarning bunday kemani qurishga hech qanday imkoniyatlari qolmasligini istagan. Aynan uning fikri bilan qutqaruv qayiqlari soni 48 tadan 16 taga tushirilgan.

Uilyam Merdok

Kema kapitanining yordamchisi Uilyam Merdok bu sohada 16 yillik tajribaga ega edi. Ammo, bu kemani qutqarib qolish uchun yetarli boʻlmadi. Kema aysbergga yaqinlashib ketayotganini juda kech payqadilar, shuning uchun ham Merdok halokatning oldini olish uchun hech narsa qila olmadi. Filmda ushbu qahramon qabih, poraxoʻr va odamlarga qarata oʻq uzishdan ham tap tortmaydigan odam qiyofasida aks ettirilgan, bundan esa Merdokning avlodlari gʻazab otiga minishgan.

Aslida kapitanning yordamchisi yoʻlovchilarni qutqarish uchun oxirgi daqiqalarga qadar harakat qilgan. Film ijodkorlari Merdokni yaramas odam sifatida koʻrsatganlari uchun uning avlodlaridan rasman kechirim soʻrashgan va Merdok nomidagi mukofot fondiga xayriya ham qilishgan. Uilyam Merdok halokatdan omon qolmagan.

• Kino
• San’at
• Tarix
• qiziqarli