Kontent-marketingning asosiy maqsadi foydalanuvchilarga brend, mahsulot va xizmat haqida ma’lumot yetkazish va xarid qilishga undashdir. WPForms hammuassisi Jared Atchisonning fikricha, bu jarayon yuqori darajada samarali ishlashi uchun iste’molchilar bilan muloqot uyushtirishning o‘ziga xos jihatlarini bilishi zarur: “Siz odamlarga qanday texnikalar ta’sir qilishini farqlashingiz va shu asosda savdo markasiga xarid ishtiyoqini oshirishni bilishingiz kerak”. 

Biroq hamma marketologlar ham bu strategiyani to‘g‘ri tushunmaydi: OptinMonster statistikasiga asoslanadigan bo‘lsak, mavjud tashkilotlarning 50 foizigina xaridorlarni jalb qiluvchi kontentdan foydalanar ekan. Shunda ham ularda faoliyat yurituvchi mutaxassislarning 63 foizi aniq strategiyaga asoslanmaydi, 62 foizi o‘z kompaniyasining samaradorligini hisoblash xususiyatiga ega emas, 60 foizi esa doimiy ravishda kontent shakllantira olmaydi. Atchison agar marketolog “qora” ro‘yxatga tushib qolishni istamasa, unda ruhan ishontirish asoslarini bilishi shart, deb hisoblaydi va kuchli kontent yaratishning asosiy tamoyillarini ko‘rsatib beradi. 

O‘zaro munosabat

Kimdir sizga yaxshilik qilsa, siz ham unga xuddi shu tarzda javob qaytargingiz keladi. Brend munosabatlarning xuddi mana shu usulini qo‘llashi mumkin. Mijozlariga bepul kontentlar (misol uchun foydali maqolalar, kitoblar, bloglar, tavsiyalar yoki darslar) taklif qilish orqali o‘zlaridan minnatdor qilib qo‘yish mumkin. Buni Atchison shunday izohlaydi: “Odamlar foydali axborotlarni bepul olar ekan, o‘zi haqida ma’lumotlar qoldiradi va kompaniya bundan maketing maqsadlarida unumli foydalanishi mumkin”. U ayni strategiya “olish uchun bermoq kerak” asosiga qurilgan bo‘lib, savdo markasi haqida ko‘proq bilishga, shuningdek, mijoz bilan ochiq va ishonchli munosabat o‘rnatishga ko‘maklashadi, natijada brend mahsulotini xarid qilish ishtiyoqini paydo qiladi, deydi.  Tadqiqotchilarning fikriga ko‘ra, bu usul holatlarning 50 foizida yuqori samara berar ekan. Shuningdek, marketologlar omma e’tiborini jalb qilish maqsadida elektron kitoblar (mutaxassislarning 27,7 foizi) va vebinarlardan (mutaxassislarning 24,9 foizi) ham foydalanishadi.

Odat kuchi
Ko‘p odamlar o‘z odatlariga amal qilishadi: agar biror mahsulotni sotib olishga o‘rgandimi, faqat o‘shani xarid qilaveradi. Kompaniyalar bundan mijozlar bilan aloqani mustahkamlash maqsadida unumli foydalanadi. Masalan, onlayn-do‘konga doimiy murojaat qiluvchi mijozga mahsulotlar ro‘yxati haqida ma’lumotlar jamlangan elektron xatlar jo‘natishi mumkin. Xuddi shu tariqa yangi mahsulotlar kelganligi xabarini ham jo‘nata oladi.  Natijada o‘zaro hamkorlik shakllanadi va bu odatga aylanib qoladi.
  
Ijtimoiy dalil
Ijtimoiy dalil – psixologik hodisa bo‘lib, odamlar afzalini aniqlay olmay qiyin vaziyat yuzaga keladi. Ikkilanish zanjirini uzish uchun xaridor atrofiga e’tibor beradi va shu asosda taxminan tanlaydi. Misol uchun, qaysi restoranga borgan ma’qulligini aniqlay olmay turganingizda, beixtiyor ko‘pchilik yaxshi fikr bildirganiga qarab yo‘l olasiz.

Atchison bu borada ijtimoiy dalilni qo‘llash ancha ishonchli bo‘ladi, deydi. Boshqa mijozlar fikriga asoslanuvchi ayni jarayon u yoki bu tovar foydasiga hal bo‘ladi. Ana shu sababga ko‘ra ham kompaniyalar ijtimoiy dalillarning turli usullarini qo‘llashi kerak, deydi va shunday ilova qiladi: “Kontent yaratar ekansiz, brendingiz mashhurligini ko‘rsatuvchi videosharh va reytinglarni qo‘llang. Bundan tashqari, saytingizda odamlarga mahsulotingizni baholovchi fikr-mulohaza qoldirishlariga imkon yarating. Ijtimoiy tarmoqlarda bildirilgan qiziqarli fikrlar bilan o‘rtoqlashing.  Bunday faollik tufayli sizning mahsulotingizga ishonch paydo bo‘ladi va brendingizga talab oshib boradi”.
  
Mutaxassis fikri

Mijozlarning aksar ko‘pchiligi tahlil qobiliyati yuksak bo‘lgan obro‘li shaxslarning fikrlariga tayanadi. Kompaniyalar esa bundan juda ham unumli foydalanadi. Misol uchun, ayrim ichimliklarni ishlab chiqaruvchilar mahsuloti yorlig‘iga turli xalqaro tanlovlarda g‘oliblik qilgani haqidagi ma’lumotlarni kiritadi. Avto ishlab chiqaruvchilarning vakillari esa tahlilchi sifatida OAVlarda chiqishlar qilishadi. Atchison o‘z xizmatlari va sifat uchun kurashini namoyish qilishi  brendning xaridor nazdidagi obro‘sini oshiradi, deya sharhlaydi. 

Jamiyat yaratish
Mijozlar o‘zlari biladigan brendlarga ko‘proq ishonishadi. Ana shu sababdan kompaniyalar aholi e’tibor beradigan maqsadli qadriyatlarni birinchi o‘ringa chiqarishadi. Masalan, sport savdo markalari xaridorlarni jalb etish uchun erkin harakat, mustaqil rivojlanish, muvaffaqiyat va sarguzasht kabi mavzularni ko‘p qo‘llashadi. “Xaridorning e’tiboriga tushish uchun ularga qaysi ishtiyoq ta’sir qilishini bilishingiz kerak. Ana shu axborotga asoslangan holda brendning asosiy g‘oyasini ishlab chiqishingiz mumkin. Asosiysi g‘oya oddiy, tushunarli va jozibali bo‘lishi shart”, – deya ta’kidlaydi Atchison. 

Xaridorlarni jalb qilishning eng samarali usullaridan biri shaxsiy jamiyatni yaratishdir. Top-menejer buning uchun odamlar bilan aloqa qilishga, ular bilan g‘oyalarni bo‘lishishga va hatto tovar ishlab chiqarishga ta’sir qiluvchi platformalar yaratgan LEGO, Starbucks yoki McDonald’s kabi brendlarga e’tibor qaratishni tavsiya qiladi. Jamiyat yaratilsa, deydi Atchison, odamlarning o‘zlari marketing maqsadlarida qo‘llash mumkin bo‘lgan kontentlarni o‘ylab topishni boshlashadi. Bundan tashqari, mijozlarni brend hayotiga jalb qilish ularni savdo markasining faol tarafdorlariga ham aylantiradi.
  
Sun’iy kamomad
Savdoda brendlar sun’iy kamomad usulini qo‘llashlari bor gap. Oqibatda mijozlar orasida mahsulotga talab oshib boradi. Ulardagi yaxshi imkoniyatni qo‘ldan chiqarmaslikka undovchi “boy berilgan foyda” sindromi xaridga undaydi.  Kompaniyalar odamzotga xos bo‘lgan mana shu odatni juda yaxshi bilishadi va undan o‘z maqsadlari yo‘lida samarali foydalanadi. Chegirmalar bunday strategiyaning yorqin misoli bo‘la oladi: brendlar chegirma yordamida odamning foydali xaridni qo‘ldan chiqarmaslik hissini qo‘zg‘ashadi. Yana bir misol tariqasida konferensiya yoki vebinarga chorlovchi mana bu e’lonni aytish mumkin: “Foydali taklif – faqat bugun!” yoki “Oxirgi 5 joy qoldi!”. Bunday jumlalar iste’molchilarning e’tiborini tortadi va savdoni kuchaytirish imkonini beradi.
  
Atchison fikrlari “Qars ikki qo‘ldan chiqadi”, degan maqolning nechog‘lik to‘g‘ri ekanligini isbotlaydi. Shu sababli ham samarali kontent yaratish uchun xaridorlar safini kengaytirishga yordam beradigan ishontirishning asosiy prinsiplarini bilish lozim bo‘ladi.

• Foydali
• qiziqarli